Policia ka arrestuar dy persona lidhur me aksidentin e rëndë të ndodhur mbrëmjen e djeshme pranë një karburanti në Shkozet, ku humbi jetën 25-vjeçari, R.B, që drejtonte një motorçikletë.
Nga kqyrja e kamerave dhe veprimet paraprake rezulton se viktima, fillimisht është përplasur nga një autobus, dhe më pas edhe nga një mjet tjetër, i cili e ka spostuar trupin e viktimës nga vendngjarja.
Policia sqaron se lidhur me aksidentin janë arrestuar në flagrancë shtetasit:
– F. T., 54 vjeç, banues në Tiranë;
– P. T., 49 vjeç, banues në Krujë.
Njoftimi i plotë i policisë
Durrës
Në lidhje me aksidentin e ndodhur mbrëmjen e datës 26.10.2019 në aksin rrugor “Tiranë-Durrës”, si pasojë e të cilit humbi jetën një shtetas, në përfundim të veprimeve të para hetimore u bë zbardhja dhe dokumentimi i plotë i ngjarjes si dhe arrestimi në flagrancë i shtetasve:
– F. T., 54 vjeç, banues në Tiranë;
– P. T., 49 vjeç, banues në Krujë.
Arrestimi i tyre u bë për shkak se në autostradën “Tiranë-Durrës”, tek mbikalimi i këmbësorëve në Shkozet, mjeti tip “Fiat Dukato” që drejtohej nga shtetasi F. T., dhe mjeti autobuz tip “Skania” që drejtohet nga shtetasi P. T., janë përplasur me motorin tip “Dajang”, me drejtues shtetasin R. B., 25 vjeç, banues në Durrës, i cili ka ndërruar jetë.
Materialet i kaluan Prokurorisë së Rrethit Gjyqësor Durrës për veprën penale ” Shkelja e rregullave të qarkullimit rrugor”.
