Kryeministri Edi Rama ka prezantuar sot projektin e ri të furnizimit me kartë elektronike të automjeteve të policisë. Duke ironizuar kohën kur policët detyroheshin të shtynin makinat se i kishte lënë karburanti rrugës, Rama deklaroi se me projektin e ri merr fund korrupsioni dhe turpi që kishte mbuluar këto struktura.
“Në drejtimin e duhur, me arritje të prekshme, që as imagjinoheshin tre vite më pare” kështu e ka quajtur kryeministri Rama punën e bërë nga Policia e Shtetit.
“Policia falë lidershipit, ministrit dhe skuadrës së pritur për të bashkuar teknologjinë me njeriun në polici është një sektor lider në këtë revolucion teknologjik që po përpiqemi të cojmë para në cdo sektor” tha Rama, duke shtuar se bëhet fjalë për kursimin e 8 milionë litra karburant dhe 9 milionë dollarë vjedhje e përvitshme.
Sipas Ramës, puna në polici është histori e sigurtë suksesi të qëndrueshëm dhe kujtoi edhe u adresoi akuzuesve dhe kritikëve shprehjen “qentë le të lehin, karvani të shkojë përpara’.
“Sa është bërë na del e tepron për të thënë se e kemi shumë të qartë se cfarë mbetet për tu bërë, kemi prova se e dimë shumë mirë punën që na kanë ngarkuar qytetarët. Po të tregonim listën e përparimeve, janë gjëra që para 3 vjetësh as imagjinoheshin, sikur t’ja tregonim njerëzve do na merrnin për romantikë jashtë realitetit, por jemi shumë të vetëdijshëm që të vazhdojmë punën për të rritur kapacitetin moral të policisë së shtetit” tha ai. Rama insistoi për fuqizimin e rolit të femrave në polici. “Mos tremben burrat se nuk po propozoj ta mbushim policinë me vajza, edhe pse ma ha mendja se nuk do e bënin punën me keq se burrat, por duke ruajtur minimuni 30% vajza në policinë e shtetit”. Në fund ai sugjeroi që cdo polici t’u shpërndaje libri i Konicës, ‘katër përralla nga Zullulandi’, ku sipas Ramës “përshkruan se si përqeshet i mencuri nga drejtuesit e paskalitur në tru të një shteti imagjinar, kjo është epoka që ne po ndajmë dhe për këtë ndarje na duhet cdo shembull i mirë të shtrihet në trupën e policisë së shtetit”. Ndërkohë ministri i Brendshëm, Tahiri theksoi se sistemi që po aplikohet merr në kohë reale fotografi me foton e makinë, shoferit, targën dhe sasinë e karburantit të konsumuar. “Në 3 muaj kursyem 150 milionë lekë, 100 mijë litra” tha Tahiri.
