Mbrëmjen e djeshme, ish-Kryeministri Sali Berisha, ishte në emisionin “Tempora” përballë një paneli gazetarësh.
Berisha foli për krizën politike në vend, aksionin opozitar, situatën ekonomike dhe sociale, dështimin në hapjen e negociatave, largimin e shqiptarëve etj.
Berisha tha se protestat do të vazhdojnë, por s’duhet të jenë periodike. “Duhet një protestë që të rrëzojë Ramën, protestat periodike e dhanë atë që mund të jepnin”, tha Berisha.
Shumë nga pyetjet që iu drejtuan liderit historik të PD-së kishin të bënin me një rikthim të mundshëm të tij në krye të kësaj partie, gjë që u mohua kategorikisht nga Berisha.
“Unë u largova dhe s’ka kthim pas nga ky vendim”, tha Berisha.
Në fund të emisionit, gazetari Edi Oga, i cili për më shumë se dy orë qëndroi në krah të ish-Kryeministrit dhe nuk kurseu elozhet ndaj tij tha “këshillat e Berishës janë shumë të vlefshme, duhen dëgjuar, dhe shpresoj që tani që jemi afër mesnatës, t’i ketë dëgjuar edhe Luli, nëse nuk është në gjumë”.
Batuta e Ogës shkaktoi humor në studio, por jo reagimin e ish-kryeministrit.
