Megjithëse qeveria ka ende në fuqi atë që quhet moratorium i pyjeve, përmes të cilit synohet mbrojtja e tyre nga prerja, duket se ligji ekziston në letër, pasi në terren po ndodh katastrofa.
Pyje ahu qindra vjeçarë po shkretohen dhe situata paraqitet alarmante veçanërisht në malin e Polisit, në zonën e Librazhdit.
Denoncimi është bërë nga Jamarbër Malltezi, kreu i Departamentit të Mjedisit në Partinë Demokratike.
Video e mëposhtme, tregon atë se çfarë po ndodh në këtë zonë, e shpallur si e mbrojtur, por që në fakt i është nënshtruar prerjes masive të pemëve.
Automjete të rënda kalojnë përmes rrugës, për të cilën gjithashtu ishte premtuar se do të rikonstruktohej, por që në fakt përdoret pikërisht nga këto mjete që transportojnë mijëra metra kub dru.
Prej 3 vitesh është në fuqi moratorium i pyejeve, ku përcaktohen edhe kriteret lidhur me dhënien e lejeve për subjektet për mundësinë e shfrytëzimit të pyjeve shtetërore.
Dhe çuditërisht prerja masive e pyjeve po ndodh pikërisht në zonën, ku 3 vjet më parë Taulant Balla, si deputet i Librazhdit, dhe sot drejtues politik i Qarkut të Elbasanit, i shoqëruar edhe nga Kryeministri Edi Rama, më 2 shkurt 2016, premtonte se mali i Polisit do të ishte zonë e mbrojtur.
Me pak fjalë nisur edhe nga video dhe pamjet që po publikon Boldnews, duket qartë se në zonën e Taulant Ballës, Moratoriumi i Pyjeve, që mban firmën e Edi Ramës, ka përfunduar në kosh.
