Një person është vrarë me armë zjarri në qytetin e Lushnjës mëngjesin e sotëm. Viktima është Besmir Hida, 35 vjeç. Autorët ishin dy dhe u larguan pasi e qëlluan viktimën me breshëri automatiku.
Ngjarja
Sipas një rindërtimi paraprak të ngjarjes, Hida ishte i ulur në një lokal në lagjen “Skënder Libohova” , që ndodhet në katin e dytë të një godine, duke pirë kafen e mëngjesit. Aty, rreth orës 8:15, është qëlluar me breshëri armësh automatike. Autorët, dyshohet se ruanin lëvizjet e Hidës dhe e kishin përgatitur atentatin.
“Sot rreth orës 08:15, në një lokal në lagjen ‘Skënder Libohova’ Lushnjë, dy persona ende të paidentifikuar, kanë qëlluar me armë zjarri automatike në drejtim të shtetasit B.H, 35 vjeç, i cili ka ndërruar jetë. Autorët janë larguar nga vendngjarja me një automjet ku në ndjekje të tyre janë vënë shërbimet e Policisë Lushnjë. Policia ka ngritur pika të shumta kontrolli në hyrje-dalje të qytetit, në aksin rrugor Lushnjë-Tiranë, Lushnjë-Fier dhe Lushnjë-Berat. Për zbardhjen e ngjarjes menjëherë është ngritur grupi hetimor nën drejtimin e Prokurorisë Lushnjë. Një grup specialistësh nga Departamenti i Policisë Kriminale në Policinë e Shtetit është nisur për t’i ardhur në ndihmë grupit hetimor me qëllim zbardhjen sa më shpejtë të ngjarjes”, njoftoi policia e Lushnjes. Disa dëshmitarë janë marrë në pyetje.
Makina e djegur
Më vonë, një makinë e djegur u gjetur në dalje të qytetit të Lushnjës, pranë By Pass-it. Mjeti dyshohet se është përdorur nga atentatorët.
Në vendin ku u gjet makina tip “Fiat” me targa shqiptare që dyshohet të jetë e vjedhur, janë gjetur dhe armë zjarri.
Viktima, daja i Zamir Latifit
Besmir Hida, i martuar, i cili kishte një pikë grumbullimi makinash të vjetra, është daja i Zamir Latifit, i vrarë para 2 vitesh në atë që u cilësua si “masakra e Lushnjes”.
Më 11 shtator, pasdite, një makinë në lëvizje qëlloi drejt personave që ishin ulur jashtë një lokali. Të vdekur mbetën Zamir Latifi dhe Jurgen Hoxha, të dy nuk i kishin kaluar të 30-at. Nga atentati mbetën edhe dy persona të plagosur.
U përfol se ishte një larje hesapesh mes bandash në qytet. Viktimat njiheshin si miqtë e ngushtë të djalit të vëllait të Aldo Bares, kreut të bandës së Lushnjës i dënuar me burgim të përjetshëm, i cili vuan dënimin në një nga burgjet e sigurisë së lartë. Laert Haxhiu dhe Orgest Bilbili, u shpallën në kërkim si autorët e ngjarjes, por edhe pse kanë kaluar më shumë se dy vite, autorët ende nuk janë kapur nga policia. /Boldnews.al/
Foto nga vendi ku ndodhi ngjarja e sotme
