Gjyqtarja e Gjykatës së Lartë, Majlinda Andrea, është kthyer paraditen e së hënës në Shqipëri nga pika kufitare e Durrësit.
Ndryshe nga nisja, ajo është kthyer vetëm, pa bashkëshortin e saj, ndaj të cilit është nxjerrë një urdhër-arresti, si person i dyshuar se u ka marrë tre shtetasve shumën 50 mijë euro, në këmbim të një vendimi gjyqësor të bashkëshortes së tij, në favor të “paguesve”.
Gjyqtarja Andrea është larguar nga Shqipëria pak orë para se kolegët e saj në Gjykatën e Lartë të vendosnin pezullimin e saj nga detyra, si edhe të nxirrnin urdhrin e arrestit për bashkëshortin e saj, Odhise Andrea, si edhe për tre persona të tjerë.
Largimi i gjyqtares Andrea pak orë para se Gjykata e Lartë të jepte vendimin, u komentua gjerësisht si një “arratisje” e saj për t’i shpëtuar hetimit. “Boldnews.al” ka raportuar më parë se hetimi ndaj bashkëshortëve Andrea, si edhe Ilia Çabirit, Eleni Linos dhe Petraq Dashit është dekonspiruar.
Majlinda dhe Odhise Andrea kani hipur në tragetin Durrës-Bari mëngjesin e së premtes, ndërkohë që trupa gjykuese e Gjykatës së Lartë vendosi masat e sigurimit ndaj tyre pasditen e së premtes.
Grupi hetimor i Prokurorisë për Krime të Rënda, i cili ka zhvilluar veprimet procedurale, ka deklaruar më parë për “Boldnews.al” se informacioni mund të ketë rrjedhur nga forcat operacionale që kanë kryer vëzhgimin në terren.
(Boldnews)
