Presidenti Ilir Meta u shpreh në komisionin e sigurisë dy ditë më parë se, mori “një informacion sekret që bënte të qartë që persona të caktuar do të përpiqeshin të shfrytëzonin mitingun e opozitës më 8 qershor, edhe për djegien e kuvendit të Shqipërisë”.
Lidhur me këtë, kreu i shtetit u pyet në konferencën e sotme për mediat. Ai zbuloi se ka pasur një kërkese zyrtare nga Kuvendi për tu njohur me këtë dokument sekret. Meta shtoi se veproi duke respektuar në mënyrë të përgjegjshme Kushtetutën e Shqipërisë. Kreu i shtetit bëri një paralelizëm me masakrën e dy prillit që njihet ndryshe si masakra e fundit e komunizmit në Shqipëri dhe çoi në humbjen e jetës së 4 të pafajshme. Meta tha se me vendimin për anulimin e zgjedhjeve lokale të 30 qershorit shmangi një akt një akt që mund të shkaktonte imazhin e një vendi të tërë.
“Në datën 7 qershor, një ditë para se të komunikoja publikisht vendimin për të nxjerrë dekretin kam pasur një informacion nga një institucion nga më të lartët të sigurisë kombëtare, unë s’kam thënë ndonjë herë ndonjë gënjeshtër. Aq më tepër në momente kaq të rëndësishme. S’mund të them diçka më shumë në respekt të ligjit. Mund t’ju them që është dërguar një kërkesë në presidencë për tu njohur me këtë informacion. Presidenca i ka kthyer përgjigje kuvendit dhe institucionit që ja ka vënë në dispozicion sipas rregullave të deklasifikimt kuvendit të Shqipërisë”, tha Meta.
“Mund t’iu them me bindje të plotë se në këtë dokument do ti ndiqni gjithfarë zhvillimet e asaj kohe, s’do ketë për publikun dokumente sekret, por çdo institucion në mënyrë të ligjshme mund të njihet. Ishte një situatë tërësisht e çmendur dhe më mirë s’mundet ta përshkruante vetë raporti final i OSBE/ODHIR, mision i drejtuar nga ambasadorja Glover i ftuar jo nga Presidenti, por nga Kuvendi i Shqipërisë, që me një fjalë e përshkruan atë situatë: ‘ky antagonizëm ishte tregues i mungesës së përgjegjësisë së përbashkët ndaj integritetit të procesit zgjedhor që duhet të tejkalonte ndasitë partiake dhe që rrjedhimisht ndikoi në të drejtën e qytetarëve për të marrë pjesë në qeverisje. Një që mund të prodhonte çdo lloj pasojë. Duhet të kemi parasysh edhe zhvillimet e rajonit dhe s’duhet të ishte surprizë as ky informacion as çdo informacion që paralajmëronin sulme ndaj institucioneve për të cilat politikanë apo grupe të caktuara ishin të interesuar. Kushdo edhe përtej dy palëve mund ta shfrytëzonte edhe për aktet e destabilizimit. Shumë prej jush e dinë shumë mirë se sot e kësaj dite se dinë kush e shfrytëzoi masakrën e 2 prillit. Padyshim që kushdo mund të kryente një akt që të shkatërronte imazhin e një vendi të tërë. Veprimet e mia janë kryer para gjithë qytetarëve shqiptarë, kamerave, Kushtetutës, dhe interesit të Shqipërisë. S’kam pasur asnjë arsye të sillesha ndryshe në këtë komision”, u shpreh Presidenti.
