Një delegacion i Komisionit të Venecias nis nesër vizitën zyrtare në Tiranë, pasi Kuvendi i Shqipërisë nisi procedurat për shkarkimin e Ilir Metës nga posti i Presidentit të Republikës.
Misioni i delegacionit nga Venecias është faktmbledhës, ndërsa javë më pas pritet edhe një raport i tij, lidhur me interpretimet që do i bëjnë veprimeve të Presidentit të Republikës, por edhe nismës së ndërmarrë në Kuvend nga deputetët socialistë.
Përplasja mes Presidentit dhe Kuvendit nisi në momentin që Kreu i Shtetit anulloi mbajtjen e zgjedhjeve vendore në 30 qershor, dekret që nuk u mor në konsideratë nga KQZ, e cila mori kompetencat e Gjykatës Kushtetuese, pasi dekretet e Kreut të Shtetit mund të interpretohen vetëm nga kjo shkallë e gjyqësorit shqiptar.
Takimet e anëtarëve të delegacionit do të nisin në orën 09:00 me kryetarin e grupit Parlamentar të PS, Taulant Balla dhe deputetë anëtarë të Grupit socialist.
Më pas, delegacioni do të takojë Kryetarët e grupeve parlamentare të asaj që quhet opozita e re, Rudina Hajdari, Nimet Musai, Adriatik Alimadhi dhe deputetë anëtarë të grupeve, për të vijuar me një takim rreth mesditës me kryetarin e Kuvendit, Gramoz Ruçi.
Më herët është thënë se delegacioni do të takojë edhe Presidentin Meta.
Po kështu raportohet se delegacioni do të takohet edhe me Oerd Bylykbashin dhe Klajda Gjoshajn, ish-deputetë të opozitës.
Sot u zhvillua një seancë dëgjimore në Komisionin Hetimor parlamentar, ku Kreu i Shtetit dha sqarimet e tij për mbi 3 orë, lidhur me vendimin për anullimin e mbajtjes së zgjedhjeve më 30 qershor.
Disa herë Meta përmendi vendime të Gjykatës së Strasburgut lidhur me të drejtën e qytetarëve për të zgjedhur, por edhe informacione sekrete që posejdonte mbi atë se çfarë mund ndodhte në Shqipëri, nëse ai nuk do të anulonte zgjedhjet në datën e dekretuar më parë.
