Policia e Shtetit ka shpallur në kërkim ndërkombëtar vëllezërit Griseldo dhe Albano Kusi, të cilët dyshohet si autorë të vrasjes së teknikun e kondicionerit, Indrit Çela, gjatë kohës që ky i fundit po punonte në vilën e familjes Kusi.
Policia dështoi në arrestimin e vëllezërve Kusi, ndërsa ka shpërndarë emrin e të kërkuarve në të gjitha pikat e kalimit kufitar.
Në sajë të hetimeve ka rezultuar se për herë të fundit antenat telefonike i kanë gjurmuar vëllezërit në qytetin e Korçës dhe më pas asnjë shenjë e tyre. Dyshohet se të rinjtë janë larguar ilegalisht drejt Greqisë.
Policia kontrolloi 3 ditë më parë një banesë në fshatin Allgjatë ku dyshohej se fshiheshin vëllezërit Kusi.
Tekniku i kondicionerit Indrit Çelaj u qëllua me plumb në kokë, sikundër është raportuar, pas një debati që ka pasur me vëllezërit Kusi.
Gjykata e Tiranës ka lënë në burg babain e autorëve të vrasjes së teknikut të kondicionerit.Gjykata ka vendosur masën e sigurisë “Arrest me burg” për shtetasit: Bujar Kusi, babanë e dy vëllezërve, Ferdinand Bakallin 41-vjeç dhe Ali Sulën të cilët akuzohen për “Moskallëzim krimi” dhe “Veprime që pengojnë zbulimin e së vërtetës”.
Ndërkohë për Luan Çakën 36 vjeç, u vendos “arrest shtëpie”.
Gjykata vendosi arrest me burg edhe për Lorenc Veliajn, i cili kishte lidhje shoqërore me dy të kërkuarit për vrasje Albano dhe Griseldo Kusit.
Këta të fundit i kishin kërkuar të merrte përsipër autorësinë e krimit. Sikundër është raportuar Lorenc Veliaj ka shpjeguar para policisë atë se çfarë ka ndodhur me vëllezërit Kusi.