Nga Boldnews.al
Gjykata e Krimeve të Rënda ka urdhëruar arrestimin e zëvendës drejtorit të Burgjeve dhe katër biznesmenëve që janë përfshirë në një aferë korruptive me tenderët e ushqimeve të të burgosurve.
Të dyshuarit u arrestuan pasditen e djeshme pas një vendimi të Gjykatës së Krimeve të Rënda, e cila pranoi kërkesën e prokurorisë për ndalimin e tyre.
Sipas një njoftimi për shtyp të Prokurorisë së Përgjithshme, të arrestuar janë zëvendësdrejtori i Përgjithshëm i Burgjeve Iljaz Labi si dhe biznesmenët Elidjan Laskaj, Ylber Kalaja, Shemsi Sinani e Nexhmi Balla.
Biznesmenët në bashkëpunim me njëri-tjetrin kishin marrë një tender ushqimesh nga Drejtoria e Përgjithshme e Burgjeve për blerje vezësh dhe bulmeti me vlerë 226 milionë lekë nëpërmjet marrëveshjes mes tyre. Për këtë tender ata do i paguanin 20 milionë lekë zëvendësdrejtorit Labi, i cili do të krijonte lehtësira në procedurat e tenderit.
Gjatë hetimeve të nisura pas referimit nga Policia e Shtetit, Prokuroria e Krimeve të Rënda ka përgjuar disa biseda mes të dyshuarve duke arritur në përfundimin se ata kanë qenë pjesë e aferës korruptive. Në njërën prej bisedave zëvendësdrejtori i kërkon biznesmenit Shemsi Sinani të shkojë ta takojë atë ditë, përndryshe të mos shkonte më.
“Po nuk erdhe sote, mos ajde fare, nuk te dua fare, po serdhe sote”, i thotë ndër të tjera zëvendësdrejtori i Burgjeve biznesmenit Sinani, i cili në fakt nuk ishte zyrtarisht fitues i tenderit, por me marrëveshje do të kryente furnizimin me ushqim dhe do të përfitonte paratë nga tenderi.
Sipas prokurorisë administratorët e kompanive “Dogel”, “Vllaznia”, “M.B.Kurti” dhe “Nelsa”, konkretisht, shtetasit Elidjan Laskaj, Ylber Kalaja, Shemsi Sinani e Nexhmi Balla, bënin marrëveshje për të kryer konkurrim fiktiv në tenderët e zhvilluara nga Drejtoria e Përgjithshme e Burgjeve, për furnizimin me ushqime.
Nga hetimi ka rezultuar se administratorët takoheshin me njëri-tjetrin dhe binin dakord për pjesëmarrjen në tender, duke shkëmbyer informacionin dhe duke përpiluar dokumentet e pjesëmarrjes në prokurime, në mënyrë të tillë që të fitonte njëri prej tyre, sipas bisedave që ata bënin.
Administratorët e këtyre shoqërive paraprakisht përcaktonin edhe se cili prej tyre do të dilte fitues në njërin prokurim apo në secilin lot prokurimi. Shoqëritë, të cilat pranonin të përpilonin dokumentacion për të mos fituar, përfitonin duke lidhur kontrata formale dhe jo formale me shoqëritë fituese dhe operonin në cilësinë e nënkontraktorit me njërën nga shoqëritë fituese.
Sipas hetimit rezulton se administratorët e kompanive kanë bashkëpunuar me njëri-tjetrin, me qëllim marrjen në mënyre fiktive të prokurimit me objekt “Blerje bulmet dhe veze”, e cila ka datë lidhje kontrate 31.5.2016 dhe me vlerë totale të kontratës 22.647.936.
“Për realizimin e qëllimit, të katër personat e dyshuar kanë biseduar për të paguar në mënyrë solidare të paktën një shumë prej 2 milionë lekësh të rinj te zëvendësdrejtori i Përgjithshëm i Burgjeve, Iljaz Labi, me qëllim që ky i fundit t’u krijonte lehtësitë e nevojshme gjatë procedurës së prokurimit”, thuhet në njoftimin e Prokurorisë së Përgjithshme.
Sipas përgjimeve dhe hetimeve në terren rezulton se zëvendësdrejtori Iljaz Labi, ka mbajtur në mënyrë kontakte dhe ka zhvilluar takime të vazhdueshme me personat nën hetim, Ylber Kalaja dhe Shemsi Sinani, duke kërkuar prej tyre përfitim për procedurën e prokurimit të datës 31.5.2016, edhe pse kontraktuesi është subjekti “Nelsa”, me administrator shtetasin Nexhmi Balla.
“Nga veprimet e tij, del qartë dijenia për kryerjen e procedurës së prokurimit në mënyrë fiktive. Detyra funksionale e tij është pjesë e zinxhirit përkatës që nga fillimi i nisjes së procedurës së prokurimit dhe deri në lidhjen e kontratës”, thotë prokuroria, e cila pohon se janë nën hetim edhe disa procedura të tjera prokurimi të zhvilluara nga Drejtoria e Përgjithshme e Burgjeve, ku përfitues janë të njëjtët persona.
Të arrestuar:
Iljaz Labi, me detyrë zëvendësdrejtori i Përgjithshëm i Burgjeve
Elidjan Laskaj, administrator i shoqërisë “Dogel”
Ylber Kalaja, administrator i shoqërisë “Vllaznia”
Shemsi Sinani, administrator i shoqërisë “M.B.Kurti”
Nexhmi Balla, administrator i shoqërisë “Nelsa”
Bisedat e biznesmenëve: Takoje atë dyshim se më çmendi me SMS
Përgjimi i parë 6 ditë përpara lidhjes së kontratës
Më datë 25.05.2016 ora 10.22.06, shtetasi Iljaz Labin zëvendësdrejtori i Përgjithshëm i Burgjeve komunikon me shtetasin Shemsi Sinani, një nga biznesmenët e arrestuar.
Iljazi e pyet: “Shemsi, po sa duhet me të taku ty o burre i dheut, 1 vite”.
Shemsiu i përgjigjet se kishte qenë nga Jugu dhe nuk kishte patur mundësi të shkonte ta takonte.
Iljazi i thotë përsëri: “ Robi thotë nuk vijë dhe nuk vijë… Po të kam bërë njëzet mesazhe o burrë..”
Shemsiu i thotë se do shkonte atë ditë. Iljazi i thotë: “ … Po nuk erdhe sotë, mos ajde fare, nuk teë dua fare, po serdhe sotë.. Shemsiu i thotë se do shkonte patjetër.
Përgjimi i dytë pas fitimit të tenderit të ushqimeve
Më datë 3.6.2016 ora 14.26.05, shtetasi Ylber Kalaja, një nga biznesmenët e arrestuar komunikon me shtetasin Shemsi Sinani, gjithashtu i arrestuar.
Ylberi i thotë Shemsiut: “Eee, po shko takoje një çikë atë dyshin atje o burrë, atje se më çmendi me mesazhe. I thashë se i kam thenë Shemes të vijë të takojë, ka një jave, ska ardhur akoma i thashë unë…. I kam then Shemes, me ardhe me të taku..”.
Shemsiu i thotë se kishte vajtur dy here dhe nuk e kishte gjetur. Ylberi i thotë përseri: “… Po shko mbaroje atë punë tani o burrë i dheut…”.
Shemsiu e pyet: Po 1 apo?. Ylberi i thotë: “ …Po 2, o burrë tani, se sjemi kalamaje, se s’dihet si merr puna o burre i dheut, te mbajme ekuliber o burre i dheut, po hajde e ulem nje cike ate, le te ulet o burre i dheut, se car do bejme me keto te tjerat a e kupton. A me kupton… Ne kemi mbajte ekuliber gjithe keto kohe, tani ta dhj… ne funde fare, kot. Me kupton?
Shemsiu i thotë: Mire po, spo na ngelet gje , e kupton. Tani po them une sic thoshe ti, tani ti spo thuaj gje…
Ylberi i thotë përsëri : “…b kemi bere vete kete menyre, a e kupton dhe ne sdo ta dhjesim tani ne funde fare, kote, a e kupton”. Shemsiu bie dakord.
