I ambjentuar në kohë rekord me transferimin përtej oqeanit, ndonëse po punon për të përmirësuar sa më shpejt komunikimin, ish-bomberi i Basel, njëherësh dhe sulmuesi i Kombëtares Kuqezi, Shkëlzen Gashi, në një intervistë dhënë për zviceranen “Blick.ch” ka shuar çdo mëdyshje në lidhje me grumbullimin e tij me Përfaqësuesen e Shqipërisë për në Kampionatin Europian “Francë 2016”, sikurse dhe ka vlerësuar me superlativa nivelin e futbollit të luajtur në MLS.
“Cilido që tallet me një ligë ku luan Kaka, Lampard, Xherrard, Pirlo dhe shumë të tjerë, nuk kupton shumë nga futbolli. Këtu janë stadiumet moderne dhe zakonisht janë plot. Mendoj se nuk ka asnjë ekip në Zvicër që është më i mirë se sa ata të MLS-së. Është krejtësisht e kundërta. Personalisht nuk kam pasur shumë kontakte me fansat, por pres me padurim t`i takoj, veçanërisht shqiptarët që jetojnë këtu. Nuk mendoj se mund të konsiderohem shpëtimtari i ekipit, por pritshmëritë tek unë janë të mëdha, bazuar në faktin që në Zvicër i kam arritur të gjitha”, deklaroi Gashi.
Sa i përket sigurisë për pjesëmarrjen në Kampionatin Europian, tashmë që është transferuar në ligën e largët përtej oqeanit të MLS, Gashi sqaron: “Unë kam folur me trajnerin e Kombëtares Shqiptare, para se të nënshkruaj për këtë klub. Ai e di se në çfarë niveli të lartë është kampionati amerikan. Ai më ka inkurajuar që të marr këtë hap”, ndërkohë që konfirmon se paraja nuk ka qenë motivi i vetëm i transferimit në Amerikë: “Paratë nuk kanë qenë pika më e rëndësishme. Po të shikoja vetëm paratë, unë tashmë do të isha duke i lidhur këpucët në Kinë apo në Emiratet Arabe”, përfundoi sulmuesi i Kombëtares Kuqezi që aktivizohet me skuadrën e Colorado Rapids, në MLS, Shkëlzen Gashi.
