Hetimet për ngjarjen e ndodhur në Durrës, ku një vajzë e mitur ka rënë pre e abuzimit, kanë nisur nga një kallim i së ëmës së vajzës së mitur.
Policia sqaron se dy të mitur kanë kryer vepra të turpshme me vajzën.
Ngjarja – “Në datë 04.07.2019, pranë Komisariatit të Policisë Durrës është paraqitur dhe ka bërë kallëzim një shtetase, e cila ka shpjeguar se rreth një javë më parë vajza e saj është gënjyer nga dy shtetas po të mitur, banorë të lagjes, të cilët kanë kryer vepra të turpshme. Për sqarimin e rrethanave të kësaj ngjarjeje, Policia e Durrësit menjëherë ka kryer të gjitha veprimet e nevojshme hetimore, duke e marrë në pyetje vajzën në prani të psikologes dhe nënës së saj, si dhe është komunikuar me prokuroren e gatshme pranë Prokurorisë së Rrethit Gjyqësor Durrës. Si rezultat i veprimeve të kryera, më datë 05.07.2019, është bërë ndalimi i një të mituri, i moshës 16 vjeç, ndërsa një i mitur tjetër i dyshuar si autor në këtë ngjarje është nën moshën e përgjegjësisë penale dhe është ndjekur në gjendje të lirë”, thuhet në njoftimin e Policisë së Shtetit.
16-vjeçari i ndaluar është me iniciale A.R. ndërsa 13-vjeçari i proceduar penalisht me iniciale N.K., njoftoi më herët policia e Durrësit.
Akuzat – Nga ana tjetër, edhe Prokuroria e Durrësit ka reaguar lidhur me ngjarjen në fjalë. Në një njoftim zyrtar, organi i akuzës shpjegoi se çështja është regjistruar “për veprën penale të parashikuar nga nenet 108/a dhe 110/2 të Kodit Penal”.
Pra, akuzat që janë ngritur ndaj të pandehurve janë “Ngacmim seksual” dhe “Heqja e paligjshme e lirisë”.
