Pas Leyla Moses-Ones, të Ngarkuarës me Punë e SHBA-së në Tiranë, kreu demokrat, Lulzim Basha, ka zhvilluar një takim me Ambasadorin e BE-së, Luigi Soreca.
Ky i fundit ka shkuar në selinë e PD-së për të diskutuar me kreun demokrat mbi situatën politike në vend, 5 ditë para 30 qershorit, datë në të cilën mazhoranca e drejtuar nga Edi Rama po shkon drejt votimeve për pushtetin vendor.
Presidenti Ilir Meta e ka cilësuar procesin si të paligjshëm dhe partiak, ndërsa Kreu i PD-së ka deklaruar se nuk do të ketë zgjedhje dhe procesi nuk do të njihet.
Duket se diplomatët e akredituar në Tiranë janë angazhuar në një proces për të shmangur përplasjet e paralajmëruara në ditën e zgjedhjeve, ndërsa opozita është shprehur e vendosur për të moslejuar mbajtjen e votimeve njëpartiake.
Shumë prej emrave të njohur të jetës publike kanë deklaruar se nuk do të pranojnë votimet e 30 qershorit, madje përmes rrjeteve sociale kanë deklaruar se janë të gatshëm të bëjnë burg dhe mos lejojnë rikthimin e proceseve si në kohën e diktaturës.
