Pak ditë më parë, Skënder Gjinushi u zgjodh si kreu i Akademisë së Shkencave, por u shoqërua me kundërshtime të shumta nga akademiku Artan Fuga, i cili e cilësoi “e premte të zezë” ditën e votimeve.
Përmes një postimi në Facebook, pedagogia Dhurata Shehri e ka nxjerrë zbuluar kreun e Akademisë.
Duke u nisur nga CV-ja e tij, pedagogia shprehet se në krye të Akademisë qëndron një njeri pa asnjë punim shkencor.
Statusi i plotë:
Gabova rëndë ku mendova se kishte mbetur ende ndonjë akademik në Shqipëri!
Duke nisur nga “kryetari”, CV-në e të cilit ju ftoj ta lexoni për te gjetur kontributin shkencor te 30 viteve të fundit!
Skënder GJINUSHI (1949–). Matematikan, profesor, akademik. Lindi në Vlorë. Shkollën e mesme e kreu në Tiranë dhe përfundoi studimet e larta në Universitetin e Tiranës në vitin 1972. Gjatë viteve 1973–1977 kreu studimet pasuniversitare në Francë (Universiteti Pierre e Marie Curie, Paris VI) dhe fitoi titullin “Doktor” i ciklit të tretë në analizën funksionale. U emërua pedagog në katedrën e matematikës së specialitetit në Fakultetin e Shkencave Natyrore të Universitetit të Tiranës (1972).
Skënder Gjinushi ka botuar tekstet “Bazat e topologjisë së përgjithshme” (1986), “Analiza funksionale” (1988), “Probleme të analizës funksionale (1992) dhe një varg artikujsh shkencorë në fushën e analizës funksionale. Në vitet 1987–1991 ka qenë deputet i Kuvendit Popullor dhe ministër i Arsimit. U aktivizua në proceset politike pluraliste dhe më 1991 u zgjodh kryetar i Partisë Socialdemokrate të Shqipërisë, funksion që vazhdon ta mbajë. Nga viti 1992 deputet në Kuvendin e Shqipërisë, kryetar i Kuvendit (1997–2001); zëvendëskryeministër e ministër i Punës dhe i Çështjeve Sociale (2001–2002).
