Nga Boldnews.al
Policia e Shtetit e ka cilësuar si një sukses aksionin për arrestimin e ish kreut të Hipotekës së Lushnjes, Elvis Bajaziti. Në njoftimin e dërguar për mediat, thuhet se Sektori për Krimin Ekonomik e Financiar në Drejtorinë Vendore të Policisë Fier si rezultat i punës së bërë, finalizoi operacionin policor të koduar “NDESHKIMI” ku në përfundim të tij bënë të mundur ndalimin e shtetasit Elvis Bajaziti.
Por ky i fundit i emëruar nga mazhoranca e “Rilindjes” në fakt është arrestuar që më 13 korrik të vitit 2015, pas një hetimi intesiv i Prokurorisë së Rrethit Fier. Fillimisht denoncimi u bë nga një pronar apartamentesh i cili, në kushtet e mospajisjes me 8 certifikatat e pronësisë, për të cilat kishte aplikuar konform ligjit. Por Bajaziti nëpërmjet shoferit të tij sekser i kishte kërkuar 3000 euro qytetarit.
Pas denoncimit në organin e akuzës, ish-kreu i ZVRPP-së dhe shoferi i tij u vendosen ne përgjim dhe më pas u bë arrestimi i tyre. Gjykata e Shkallës së Parë së Lushnjes vendosi si masë sigurie “Arrest me Burg” për Bajazitin, por kjo u rrëzua nga Gjykata e Apelit. Ndërkohë, vetëm një ditë më parë, Kolegji Penal i Gjykatës së Lartë ka vendosur masën e sigurisë “Arrest me burg” dhe këtu policia ka bërë arrestimin e tij duke e cilësuar si një operacion të sukseshëm.
Kjo nuk është hera e parë që Policia e Shtetit nëpërmjet njoftimeve propogandon suksese imagjinare. Pak ditë më parë, Boldnews.al raportoi për arrestimin e gabuar të Policisë së Durrësit të shtetasit Bedri Haka.
