Policia ka nisur provokimet ndaj qytetarëve vetëm pak orë para protestës së thirrur nga opozita.
Denoncimi është bërë nga ish-deputeti demokrat, Klevis Balliu, sipas të cilit policia në Pogradec po tenton të arrestojë qytetarë për të ushtruar presion ndaj atyre që mos marrin pjesë në protestën e opozitës.
“Vetëm pak orë përpara protestës së opozitës, Policia po provokon qytetarët.
Në Pogradec efektivë të Policisë po mundohen të arrestojnë qytetarët në tentativë për të trembur çdo shqiptar që proteston kundër kësaj klike në pushtet. Këto janë provokime të pafytyra, të cilat vetëm sa tensionojnë edhe më shumë situatën.
I bëj thirrje Policisë që të distancohet nga këto arrestime të paligjshme të qytetarëve shqiptarë.
Asgjë dhe askush nuk i ndal shqiptarët në betejën e tyre për liri, demokraci dhe integrim”, thekson Balliu.
