Një tjetër parti është tërhequr nga pjesëmarrja në zgjedhjet e 30 qershorit. Subjekti ‘Zgjidhja’ i drejtuar nga Koço Kokëdhima ka vendosur sot të mos regjistrohet në KQZ për zgjedhjet lokale, ndonëse më parë kishte deklaruar kandidaturën e tij për Bashkinë e Tiranës.
“Zgjidhja” ka publikuar një rezolutë, në të cilën theksohet se nuk do të regjistrohet në zgjedhjet e 30 qershorit.
“Hyrja e partisë ‘Zgjidhja’ në zgjedhjet e 30 qershorit nuk do t’i përmirësonte standardet e tyre të munguara dhe se zgjedhjet jo gjithpërfshirëse e përçajnë dhe e destabilizojnë edhe më keq Shqipërinë. Prandaj vendosi që: Partia ‘Zgjidhja’ të bojkotojë zgjedhjet e 30 qershorit dhe të kërkojë shtyrjen e tyre për në vjeshtë. ‘Zgjidhja’ fton edhe partitë e tjera që janë regjistruar në KQZ që të tërhiqen nga zgjedhjet e 30 qershorit”, thuhet në rezolutë.
Në vijim, partia e drejtuar nga Kokëdhima i bën thirrje PS-PD-LSI që të ngrihen mbi interesat e ngushta dhe të bashkohen në një pakt të madh kombëtar “me nevojën imediate për reformimin dhe hapjen e sistemit, si e vetmja rrugë shpëtimi nga kriza dhe garantimi të stabilitetit politik afatgjatë”.
“‘Zgjidhja’ apelon trupin diplomatik në Tiranë, veçanërisht selitë e vendeve të BE-së dhe atë të SHBA që me përgjegjësi të lartë në këtë situatë të informojnë qeveritë e tyre për rrezikun që i paraqitet Shqipërisë, por edhe rajonit, nga një konflikt i mundshëm i partive të vjetra, për të mbajtur apo rimarrë pushtetin”, thuhet më tej.
