Pronarja e kopshtit privat “Diren”, Anjeza Shabani që u filmua duke dhunuar një prej fëmijëve vetëm 3 vjeç ka dalë sot para gjykatës për të marrë masën e sigurisë. Gjykata ka vendosur masën e sigurisë ‘arrest me burg” ndaj saj.
Para se të hynte në Gjykatë, Anjeza është pritur jashtë nga babai i saj, i cili ka hipur në kangjellat rrethuese të gjykatës për të përshëndetur vajzën e tij dhe për t’i dhënë zemër, shkruan Balkanweb.
Sapo zbriti nga furgoni i policisë, Anjeza Shabani vuri re praninë e të atit dhe i tha: “Jam mirë babi”. Ndërkohë i ati u ngjit në kangjellat e gjykatës duke i thirrur: “Bravo babë, qëndro e fortë”.
Prokuroria e Tiranës dorëzoi dje në Gjykatë kërkesën për caktimin e masës së sigurisë “arrest me burg” për shtetasen Anjeza Shabani, administratore e kopshtit pa licencë, “Diren”.
Referuar hetimeve dhe dëshmive të prindërve të vogëlushit filmimi i momenteve të dhunës është bërë 20 ditë më parë, ndërsa dhuna ka rreth 6 muaj që ndodh, nisur edhe nga gjendja e përkeqësuar e 3-vjeçarit.
Regjistrimi i akteve të rënda është bërë nga kamerat e vendosura në çantën e djalit të autorit të kallëzimit ndaj Anjeza Shabanit.
