Alban Vogli, presidenti i klubit krutan të Kastriotit që dhunoi shtazërisht gazetarin Eduard Ilnica ka lënë sot qelinë pasi Gjykata e Apelit ka caktuar masën “detyrim paraqitje” ndaj tij.
Vogli u arrestua më 9 maj pasi dhunoi barbarisht gazetarin sportiv Eduard Ilnica, të cilin tentoi edhe ta merrte peng. Më 12 maj gjykata e Tiranës vendosi “Arrest me burg” për Voglin, i cili nuk pranoi akuzat dhe apeloi masën e sigurisë, çka ka sjellë edhe vendimin e sotëm të Apelit.
Relatore e çështjes ka qenë gjyqtarja Maria Qirjazi, ndërsa pjesë e trupit gjykues kanë qenë edhe gjyqtarët Ervin Metalla dhe Fiqirete Mullai, pikërisht e njëjta trupë që vendosi rikthimin e Drejtorit të Përgjithshëm të Policisë Haki Çako në detyrë pas pezullimit të tij në lidhje me skandalin e përgjimeve.
Nuk dihet nëse do të ketë një reagim të ministrit të Brendshëm si në rastin e kryepolicit Çako që sulmoi gjykatën dhe prokurorinë.
