Vladimir Gjuta, personi që u dyshua për vendosjen e tritolit te Farmacia e babait të Ministrit të Brendshëm, ka mohuar para gjykatës të mërkurën se ka ushtruar dhunë ndaj babait të tij.
Gjuta u arrestua nga policia dy ditë më parë, pasi, sipas denoncimit të familjarëve, ai kishte ushtruar dhunë fizike ndaj babait dhe bashkëshortes së tij.
Ai doli të mërkurën para gjykatës së Tiranës, ku duhet të përballet me dyshimet se ka kryer veprat penale të “Dhunës në familje” dhe “Largimi nga vendimi qëndrimit”, pasi ndaj tij është në fuqi masa e sigurisë “Arrest në shtëpi” dhënë nga gjykata e Kukësit për veprën penale të “Fallsifikimit të dokumentave”.
Në seancën, ku gjykata caktoi masën e sigurimit “arrest në burg”, Gjuta ka dhënë versionin e tij mbi dyshimet për dhunë në familje.
Sipas tij, ai ka qenë në shtëpinë dy-katëshe të babait të tij, së bashku me bashkëshorten dhe fëmijën e tyre 10-muajsh. Ai ka qenë duke fjetur në një dhomë në katin e parë, kur në mes të natës foshnja ka filluar të qajë dhe Gjuta ka menduar se fëmija ishte sëmurë. Për këtë arsye, ai ka kërkuar që të dërgojë djalin në spital, për ta vizituar mbi shqetësimet që mund të kishte. Kjo kërkesë e tij është kundërshtuar nga bashkëshortja dhe ndërmjet tyre ka nisur debat. Në diskutimet me tone të larta, në dhomën e tyre ka mbërritur edhe babai dhe vëllai i Vladimirit, të cilët ishin duke fjetur në katin e dytë të banesës kur dëgjuan debatet.
Pasi debatet nuk po merrnin zgjidhje, babai i Vladimirit ka njoftuar policinë, me qëllim që të shmangnin përkeqësimin e situatës. Sipas familjarëve të Vladimir Gjutës, gjatë kohës që ka qenë në paraburgim si i dyshuar për tritolin te Bashkim Tahiri, ai ka shfaqur ç’rregullime mendore. Pikërisht për këtë arsye, ata nuk e lejonin Vladimirin që të merrte fëmijën dhe ta dërgonte në spital. Duke qenë se Vladimiri nuk po bindej, ata kanë njoftuar policinë, e cila ka kryer arrestimin e tij në flagrancë, i dyshuar për dhunë në familje.
Gjatë pyetjeve në Polici, rezulton se babai i Vladimirit, ka deklaruar se ndaj tij është ushtruar dhunë nga i biri. Ndërkohë, ky deklarim nuk përputhet me deklarimin e vëllait të Vladimirit. Ky i fundit, sipas referimit të policisë, ka pranuar ushtrimin e dhunës, por dokumenti nuk është firmosur prej S. Gjutës. Për këtë arsye, ai është pyetur nga prokurori i çështjes, para të cilit vëllai i Vladimirit nuk e ka pranuar që të jetë ushtruar dhunë ndaj babait të tij.
Çështja ndërlikohet edhe më tej, pasi një ditë pas arrestimit të Vladimir Gjutës, babai i tij, Ferit Gjuta ka dalë publikisht, duke mohuar të jetë ushtruar dhunë ndaj tij. Për më tepër, ai thotë se nuk e di që ka firmosur një dokument, në bazë të të cilit pranon se është rrahur nga djali i tij.
Gjithësesi, ndaj Vladimir Gjutës ekziston dyshimi se ka thyer edhe urdhërin e gjykatës për të qëndruar në masën e arrestit në shtëpi. Sipas vendimit të gjykatës, ai duhet të qëndronte në banesën e tij, ndërkohë që policia e ka gjetur në shtëpinë e babait. Edhe për këtë çështje, Gjuta ka deklaruar në gjykatë se nuk ka njoftim nga avokati mbi këtë vendim të gjykatës.
