Socialistët në Durrës duket se po shkojnë drejt zgjedhjes së kandidatit për kryebashkiak, ndërsa emri i favorizuar është ai i Spartak Kovaçit, drejtor i Ujësjellësit në qytetin bregdetar.
Pavarësisht debateve dhe përplasjes mes klaneve në një prej degëve më të mëdha të PS-së, siç është ajo e Durrësit, duket se Kovaçi ka mbështetjen e kryebashkiakut aktual, Vangjush Dako, dhe rrjedhimisht edhe të Edi Ramës.
Madje, sikundër është raportuar pak javë më parë, Kovaçi ka qenë një ndër të ftuarit e një darke konfidenciale që Rama ka organizuar në Durrës, pas një takimi të zhvilluar në qytetin bregdetar në kuadër të turit “Bashkia që Duam”.
Burime nga PS shprehen se ndër emrat e propozuar, duket se Kovaçi ka arritur të marrë suportin e duhur për të pretenduar zëvendësimin e Dakos në krye të bashkisë.
Veç emrit të Kovaçit, në garën brenda PS-së për kryebashkiak, janë propozuar edhe Ardian Çela, drejtor i OSHEE-së, Arbër Braho, aktualisht nënkryetar i Bashkisë së Durrësit, dhe Rovena Voda, zv.ministre.
Kovaçi njihet si një ndër bashkëpunëtorët e afërt të Vangjush Dakos, i cili ka marrë përsipër të drejtojë fushatën për zgjedhjet lokale në bashkinë që ka drejtuar prej vitit 2007.
Emri i Dakos, sipas raportimeve dhe deklaratave të opozitës, rezulton i përfshirë në dosjen 339, që ndodhet në duart e prokurorëve dhe ka të bëjë me shit-blerjen e votave.
