Partia Demokratike dhe aleatët e saj po punojnë lidhur me platformën e punës së qeverisë tranzitore, që përbën një nga kushtet e opozitës së bashkuar për përgatitjen e zgjedhjeve të parakohshme parlamentare.
Sikundër mësohet, opozita propozon që kjo qeveri tranzitore të ketë një mandat 3-6 muaj, ndërsa në fokus të punës së saj të jetë përgatitja e terrenit për zgjedhjet.
Burime nga partitë opozitare shprehen se qeveria tranzitore do të formësohet me konsensusin e të gjithë aktorëve dhe faktorëve politikë, ndërsa një nga detyrat kryesore të saj do të jetë reformimi i Kodit Zgjedhor.
Gjithashtu propozohet depolitizimi i komisioneve zgjedhore, propozim ky kryesisht i partive të vogla, por që ka gjetur mbështetjen edhe nga PD.
Në kushtet kur PD, LSI dhe partitë të tjera të opozitës, si LZHK, PDK, PR dhe PBDNJ, nuk janë më në Kuvend për shkak të dorëzimit të mandateve, propozohet që ndryshimet apo reformimi i Kodit Zgjedhor të mos realizohet përmes Komisionit ad-hoc të Reformës Zgjedhore, i cili në përbërjen e tij ka socialistë dhe deputetë të asaj që quhet opozita e re, por të jetë një nga prioritetet e qeverisë tranzitore.
Gjithashtu propozohet që qeveria të ketë në fokusin e saj goditjen e krimit dhe lidhjeve të tij me politikën.
Deri më tani palët janë në qëndrime krejt të kundërta, ku opozita kushtëzon pjesëmarrjen në zgjedhje me largimin e Edi Ramës nga posti i kryeministrit, si hapin e parë në zgjidhjen e krizës politike.
Ndërkohë që Partia Socialiste insiston në zhvillimin e zgjedhjeve më 30 qershor, ndërsa ka paralajmëruar përballjen me ligjin të kujdo që do të tentojë të bllokojë procesin zgjedhor.
