Kryetari i Partisë Demokratike, Lulzim Basha, në një lidhje telefonike me emisionin “Të Paekspozuarit”, ka deklaruar se opozita nuk kërkon pushtet në tavolinë, por se me kryeministrin Rama nuk mund të ketë zgjedhje.
Basha tha se së shpejti PD do të paraqesë një platformë, që detajon qeverinë tranzitore.
“Opozita nuk kërkon pushtet në tavolinë, beteja nuk është për pushtet. Kjo betejë është për rregullat bazë të demokracisë, zgjedhje të lira dhe të ndershme, për ti dhënë fund këtij grushti shteti. Jemi i vetmi vend pa Gjykatë Kushtetuesë. Jemi në nivele rekord të korrupsionit qeveritar.
Jemi në rekorde sa i përket krimit të organizuar Jemi në një krizë kushtetuese dhe politikë, pasoja të së cilës janë kriza politike dhe sociale. Opozita kërkon të kthejë themelin e bashkëjetesës demokratike, që është vota e lirë. Thomas Jefferson, ka thënë, “tirania është kur populli ka frikë qeverinë, liria është kur qeveria ka frikë nga populli”.
Sot populli kërcënohet nga qeveria e lidhur me krimin dhe qveria ka frikë krimin. Jemi në një situatë tiranie, jo si ajo tirania ideologjike, por tirania e prodhuar nga lidhja e Edi Ramës me krimin. Kujdestar i zgjedhjeve të ardhshme nuk mund të jetë njeriu që është kapur.
Kërkojmë që shqiptarët të vendosin me votë dhe të mos vendosin Bajrat, Nicet dhe Avdylët.
Ka një dokument detyrash të qeverisë tranzitore të cilën në po e diskutojmë me aleatët, do ta diskutojmë edhe me ju gazetarët. Kemi platformë për qeverinë tranzitore, do t’ju ftojmë edhe ju dhe gazetarët që i shërbejnë opinionit publik. Kemi të gjithë vizionin dhe shumë shpejt do t’jua shpalosin atë”./TPZ/
