Nga Boldnews.al
Fasadë…Kështu e nisi Edi Rama ngjitjen politike pasi u kthye nga Parisi, “i palarë, i parruar e thoj paprerë”- siç e etiketonte kryeministri i kohës Fatos Nano.
Por Rama kërkonte dukjen, sy, diskutime, kronika televizive, vëmendje mediatike e mundësisht edhe sulm nga kundërshtarët. Puna e parë që bëri ishte rikonstruksioni i jashtëm i godinave të ministrive, ose fasadat.
Edhe sot nuk po bën asgjë më shumë dhe më pak. Në qeverisjen e parë “Rama 1” hodhi 700 milionë euro për ndërtimin e qendrave të qyteteve, të mëdha e të vogla. Aty ndajnë dy botë, ajo që shihet me sy në një territor të vogël me shatërvanë, lulishte, pllaka fringo dhe stola të fisëm, ku pushojnë të papunë, të varfër dhe pensionistë të vobektë.
Pjesa tjetër jashtë qendrave të vogla është dhimbje, varfëri, arrogancë përbuzëse në zyrat e shtetit dhe një botë vituale e Rilindjes. Sot Rama është në ditët më të vështira, ku djegia e mandateve të deputetëve të opozitës dhe largimi i saj nga çdo institucion shtetëror, e detyruan që të dalë në “treg” për të blerë një opozitë të re.
Fillimisht përkrahu e madje shtyu nën presion dhe joshje që vendet e lëna bosh nga deputetët opozitarë, të plotësoheshin nga listat e tjera fundore, duke sjellë në Parlament emra tërësisht anonim, që një ditë e panë veten deputetë.
Rudina Hajdari dhe Myslym Murrizi ishin dy deputetët demokratë që dolën jashtë vendim politik të Partisë Demokratike dhe nuk pranuan të djegin mandatet. Padyshim që kjo i shkon përshtat më shumë se gjithkujt tjetër kryeministrit Edi Rama. Ai kërkon dhe rikthen vetëm Fasadën dhe atë e ka ngjizur në opozitën e re, po fasadë.
Vetë Rudina ligjërisht është në të drejtën e saj personale për të mos dorëzuar mandatin. Është gjithashtu në kredon po personale për të vijuar të bëjë “opozitë” qoftë edhe në interes personal, apo të qytetarëve që të ndihen të përfaqësuar. Por vajza e ish-heroit të demkoracisë Azem Hajdari, me apo pa qëllim, po bën opozitën fasadë që i shkon përshtat vetëm Ramës.
“Një politikbërje të re me standarde perëndimore do të ishte një iniciativë për t’u gëzuar. Pak ditë më parë, në deklarimin që bëra në Parlament, shpreha vullnetin e grupit që kryesoj dhe ky do të mbetet angazhimi im kryesor. Natyrisht, në rrugëtimin që kemi nisur, prania e demokratëve të ndershëm dhe gjithë atyre që aspirojnë një demokraci të vërtetë, do të jenë mbështetja e jonë”, tha sot Hajdari në një reagim publik në rrjetet sociale.
Po ku do e bëjë politikën me “standarte perëndimore” Rundina? Përballë Ramës, që me standardin e ngritur i shkon ngjashmërisht autokracive të Lindjes? Gjithashtu ajo ka artikuluar edhe se do të marrë pjesë në zgjedhjet e 30 qershorit. Me logon e PD-së, zonja që erdhi nga SHBA si “prurje” e veçantë, nuk mund të konkurrojë përballë Ramës dhe as nuk mund të mbajë Rilindjen e vdekur.
Ndaj krijimi i një opozite të re, sa për një logo në treg është shansi i vetëm në duart e Ramës, për të kaluar lumin e thellë dhe të rrëmbyeshëm. Nuk iu nda Fasadave, sot po e kërkon edhe në ngjizjen e partive politike, që janë degë të trungut të Rilindjes…!
Sa për fasadë do të konsiderohet se në vend ka pluralizëm politik dhe konkurrencë të ndershme. Çështja është tek besimi! Sot fasadave të kryeministrit i ka dalë boja, ndaj as propaganda si “armë shfarosëse” nuk mund të ndalë zëmërimin qytetar, që më shumë se e inspiruar nga opozita zyrtarë është fort e frustruar kundër qeverisë.
