Kryetari i PD-së, Lulzim Basha, ka thirrur në një takim kryebashkiakët, përfaqësues të kësaj force politike.
Mësohet se mbledhja do të zhvillohet të hënën, ndërsa të pranishëm do të jenë 15 kryebashkiakët që në zgjedhjet e 2015 kandiduan nën siglën e PD-së.
Ndërkohë një mbledhje të ngjashme pritet të zhvillojë edhe kryetarja e LSI-së, Monika Kryemadhi, me kryebashkiakët që përfaqësojnë këtë forcë politike.
Nuk dihet nëse në këto mbledhje, kryetarëve të bashkive do t’u komunikohet vendimi për të mos marrë pjesë në zgjedhjet e 30 qershorit, apo do të kalohet në një tjetër hap, atë të djegies apo dorëzimit të mandateve edhe prej tyre.
Nëse ndodh kjo, atëherë do të kemi një tjetër situatë politike të pandodhur më parë. Pak javë më parë aleatë të Lulzim Bashës, dashamir Shehi dhe Fatmir Mediu artikuluan idenë e një sulmi 360 gradë të opozitës dhe qytetarëve kundër kryeministrit Edi Rama, duke mospërjashtuar idenë e djegies së mandateve edhe nga drejtuesit e bashkive.
Ndërkohë KQZ ka shtyrë deri në datën 23 prill afatin për regjistrimin e partive për zgjedhjet lokale të 30 qershorit.
Opozita ka deklaruar se në 30 qershor nuk do të ketë zgjedhje, ndërsa përfaqësues të mazhorancës kanë paralajmëruar dënime me burg për cilindo që do të tentojë të bllokojë apo cënojë proçesin e votimit. /BN/
