Kryeministri Edi Rama duket se ka urdhëruar anëtarët e qeverisë që të dalin një nga një në konferencë për mediat lidhur me protestës e djeshme të opozitës.
Pas Sandër Lleshit, ka reaguar Etilda Gjonaj, ministre e Drejtësisë, e cila lexoi pothuajse të njëjtin format deklarate, ndoshta të shkruar nga e njëjta dorë.
Ashtu si edhe Lleshaj, Gjonaj tha se gjatë protestës u konsumuan thirrje anti-kushtetuese dhe protesta ishte revolucion.
Gjonaj kërkoi nga organet e drejtësisë të hetojnë dhe çojnë para drejtësisë përgjegjësit e dhunës së djeshme.
“Nuk janë protesta të qytetarëve por të nxitura me akte dhune nga lidershipi i tyre. Nga këto akte dhune dëmtohet Shqipëria.
Nxisim organet ligjzbatuese dhe organet e drejtësisë për të hetuar dhe cuar para drejtësisë përgjegjësit e kësaj dhune dhe për të bërë drejtësi për policët e dhunuar.
Këto shfaqje e dëmtojnë Shqipërinë edhe në sytë e vendeve të tjera.
Është e papranueshme dhuna në çfarë do lloj proteste, por është e patolerushme kur organizohet nga partitë politike.
Shqiptarët panë dhe kuptuan se protesta e djeshme si ato të muajt e fundit, nuk janë të qytetarëve por protesta të nxitura me dhunë për interesat e liderit të opozitës.
Qëllimi i i tyre është i ditur, kërkohet destabilizimi i vendit, sidomos në këtë periudhë. Nga këto akte dëmtohet Shqipëria ndaj nxisim organet që të hetojnë në mënyrë të pavarur e të dërgojnë përpara drejtësisë këta persona.
Këto shfaqje të dhunës e dëmtojnë Shqipërinë edhe në sytë e shteteve të tjera. Por ne do të çojmë përpara Reformën e Drejtësisë”, u shpreh Gjonaj.
