Ish-deputeti i PD, Ervin Salianji në një intervistë në “Opinion” në News 24, tha se grabitja e ndodhur një ditë më parë në Rinas, tregon se qytetarët nuk janë të sigurtë.
Ndërkohë i pyetur për situatën politike, dhe nëse PD ka nisur përgatitjet për zgjedhjet e qershorit, Salianji u shpreh që ata si parti politike janë gjithnjë në përgatitje për zgjedhjet, por shtoi se nuk mund të futen në zgjedhje pa gjetur një zgjidhje lidhur me reformën zgjedhore.
“Ne jemi parti politike dhe jemi gjithmonë në përgatitje për zgjedhje. Por nuk mund të ketë zgjedhje pa pasur një zgjidhje për të gjithë sistemit zgjedhor. Zgjedhje nuk janë kur hyn Edi Rama dhe tenton të marrë me zor bashkitë, por ajo çfarë vendos populli. Zgjedhje nuk mund të ketë pa opozitën”, u shpreh Salianji ndër të tjera, ndërsa ka kujtuar sërish protestën që do të zhvillohet në orën 18:00 ditën e shtunë, ku tha se veç orës që do të mbahet, do të ketë edhe surpriza të tjera.
