Një sasi lënde narkotike është sekuestruar nga policia në Korçë, ndërsa është shpallur në kërkim një 33 vjeçar.
Mbrëmjen e djeshme forcat operacionale të Policisë së Shtetit zhvilluan kontrolle në disa zona të qarkut të Korçës në kuadër të rritjes së sigurisë.
Si rezultat i kontrolleve, policia ka arrestuar në Pogradec një person, ndërsa një tjetër është shpallur në kërkim në Korçë.
Mësohet se është shpallur në kërkim shtetasi M.M, 33 vjeç, banues në Korçë, pasi gjatë një kontrolli të ushtruar në lokalin në pronësi të këtij shtetasi, iu gjetën dhe sekuestruan 7 shiringa me mbetje lënde të dyshuar narkotike.
Gjithashtu gjatë kontrollit të mjetit të tij tip “Renault” i cili ndodhej i parkuar përpara lokalit, iu gjetën dhe sekuestruan në cilësinë e provës materiale 74 doza me lëndë narkotike të dyshuar Kokainë.
Ndërkohë është arrestuar edhe shtetasi L.B, 34 vjeç, banues në Pogradec.
Arrestimi i tij u bë pasi, gjatë kontrollit të ushtruar ndaj këtij shtetasi i cili lëvizte me një mjet tip motorr në aksin rrugor Pogradec-Tushemisht, iu gjetën dhe sekuestruan në cilësinë e provës materiale 2.93 gram lëndë narkotike e dyshuar Kokainë dhe një sasi e vogël lëndë narkotike e llojit Cannabis Sativa.
