Vendimi për 4 të pandehurit që u gjykuan për vrasjen e 19-vjeçarit Marvi Mihali, ngjarje e ndodhur në 31 korrik 2017, do të jepet më 11 prill.
Gjykimi për 4 të pandehurit është mbyllur sot, ndërsa personi që ka pranuar krimin është Dejvi Bitraj.
Avokati i tij ka kërkuar ndryshimin e akuzës nga vrasje me paramendim në vrasje në zënie e sipër.
Pas pranimit të krimit nga njëri prej të akuzuarve është kërkuar nga avokatët e të pandehurve të tjerë pafajësia për Eugen Bitraj, Kridens dhe Marsel Alla.
Më 4 mars, Prokuroria ka dhënë pretencën ndaj të pandehurve, ndërsa kërkoi 87 vjet burg për 4 të arrestuarit.
Kështu prokuroria kërkoi dënimin e Dejvi Bitraj me 24 vjet burg, Marsel Alla 20 vjet burg, Kridens Alla 25 vjet burg dhe Eugen Bitraj 18 vjet burg.
Krimi i rëndë ndodhi pas një sherri për një karikues telefoni, ndërsa nga videot e publikuara, ka rezultuar se Marvi Mihali, është sulmuar egërsisht nga grupi i të rinjve, megjithëse viktima nuk ka sulmuar askënd më parë.
Sipas prokurorisë, autori i ngjarjes është Dejvi Bitraj, ndërsa 3 të pandehurit e tjerë, kanë qenë bashkëpunëtor.
Ndërkohë, gjatë seancës së sotme, prokuroria dha edhe vlerësime të saj mbi veprimet e autorëve të dyshuar, duke i konsideruar të papranueshme.
Gjithashtu, edhe për personin që nisi sherrin, prokuroria e konsideroi një veprim të papërgjegjshëm, që solli pasojë të rëndë.
