Fatmir Guda, kandidat për deputet në listën e PD-së për Qarkun e Korçës, ka refuzuar marrjen e mandatit për deputet.
Përmes një postimi në rrjet, Guda shkruan se është nder dhe privilegj për të qenë pjesë e Parlamentit, të përfaqësosh dhe mbrosh interesat e qytetarëve, por ja që kushtet në të cilat më ofrohet marrja e mandatit të deputetit janë krejtësisht larg normalitetit.
Postimi i Fatmir Gudës
Por ja, që kushtet në të cilat më ofrohet marrja e mandatit të deputetit janë krejtësisht larg normalitetit, pasi institucioni bazë i demokracisë gjendet në krizën më të thellë të përfaqësimit të tij, për shkaqe të njohura botërisht, që fillojnë nga përfshirja në të e elementëve të botës së krimit dhe deri tek përdorimi i kartonave të tij në mënyrë autoritariste për uzurpimin në një dorë të vetme të të gjitha pushteteve. Në princip është vetëm një parlament i dalë nga lekët e krimit dhe me detyrimin e vetëm për t’i shërbyer interesave të krimit.
Është kjo situatë që dhe u ka diktuar partive opozitare vendimarrjen politike më të papreçedentë , siç është akti ekstrem i djegies në grup të mandateve parlamentare.
Pa dashur të abuzoj e ta bëj edhe më qesharak termin “u konsultova me ndërkombëtarët”, ju bëj me dije, se përveç leximit qartë të verdiktit unanim të strukturave drejtuese të PD dhe opozitës së bashkuar, të vetmit me të cilët mbartja detyrimin për tu konsultuar ishin ata që më kanë mbështetur në të gjitha sfidat e mia politike, sikundër edhe gjatë fushatës elektorale të 2017, të cilët më kërkuan të mos dilja jashtë vullnetit politik të subjektit që unë përfaqësoj.
Edhe pse e gjykuam se parlamenti ishte vëndi dhe rasti i duhur për të ngritur me forcën e arsyes një nga çështjet më me rëndësi, siç është korrigjimi i hartës territoriale administrative, konkluduam se ky institucion tashmë e ka humbur legjitimitetin dhe moralin. Si i tillë axhenda e tij është vetëm në funksion të narkoshtetit e me një mungesë të theksuar vullneti dhe dëshire për të dëgjuar e respektuar çdo zë opozitar. Ndaj dhe emergjencë kombëtare është zvëndësimi sa më herët i tij me një kuvend shqiptarësh të dalë nga vullneti i lirë i qytetarëve.
Ja përse asnjë lloj tundimi, presioni apo shantazhi i pamunguar i këtyre ditëve s’më ka dyzuar aspak ta refuzoj prerazi mandatin e ardhur antikushtetuetshmërisht, duke shpresuar shumë, se me këtë akt as kam qënë dhe as do jem i vetmi, që do i vij sado pak në ndihmë dhe një sahat e më parë zgjidhjes së krizës politike në vënd.
Dhe së fundi, pa dashur aspak t’ju lë shijen e një “skllavi” apo “heroi” partiak dua tu bëj me dije se,
ME QINDRA HERË TË TJERA TË MË OFROHEJ NJË MUNDËSI E TILLË, NË TË TILLA RRETHANA, PA U MENDUAR DY HERË, PO NJËLLOJ DO TA REFUZOJA.
Aspak i lumtur për katandinë e mexhlisit të popullit tim, edhe unë kam zgjedhur të rri me qytetarët dhe s’do të rresht së kontribuari dhe luturi në zot, që Shqipëria jonë ti rikthehet stabilitetit dhe vlerave të demokracisë evropiane!
