Policia e Shtetit arrestoi një ditë më parë 3 persona dhe shpalli në kërkim një tjetër lidhur me vrasjen e Nard Polisë, i njohur ndryshe si Nardi i Bujtinave.
Sipas policisë, të arrestuarit janë G.T 26 vjeç, banues në lagjen “Skënderbeg” të Shkodrës, K.T, 29 vjeç, lindur dhe banues në lagjen “Skënderbeg”, A.M, 20 vjeç, banues në fshatin Bardhaj, Shkodër, si edhe u bë shpallja në kërkim e shtetasit K. S., 27 vjeç dhe po punohet për gjetjen dhe kapjen e tij, i cili dyshohet të jetë personi që ka kryer vrasjen.
Por, të tre të arrestuarit kanë mohuar akuzat që i janë ngritur nga policia. Burime policore bëjnë të ditur se gjatë marrjes në pyetje ata kanë mohuar që të kenë gisht apo të kenë bashkëpunuar për vrasjen e 32-vjeçarit Polia.
Burimet bëjnë të ditur se i arrestuari A.M ka pohuar se automjetin më datën 20 mars ia ka dhënë shtetasit K.S, i cili është shpallur në kërkim, ndërsa kanë mohuar që të kenë qenë në automjet .
Një ditë më parë, policia bëri të ditur se në bazë të kamerave të sigurisë te Ura e Mesit dhe bizneseve të zones së Hotit të Ri kanë identifikuar mjetin me të cilin 3 persona të dyshuar kanë lëvizur me qëllim kryerjen e atentatit ndaj Nard Polisë, vrasje e kryer me 20 mars 2019 në fshatin Grudë e Re.
Nga kqyrja e kamerave të sigurisë është bërë e mundur edhe identifikimi i mjetit i cili ka përcjell lëvizjet e mjetit tip motorcikletë dhe më pas pas djegies së tij janë larguar nga vendi i ngjarjes.
Nga sa mesohet i dyshuari kryesor si personi që ka kryer vrasjen është larguar nga Shqipëria sapo ka kryer krimin, ndërsa po punohet për motivin e kësaj vrasje.
