Vijojnë hetimet për vrasjen e avokatit Ravik Gurra, i ekzekutuar mbrëmjen e së premtes me dy plumba, teksa po konsumonte një kafe në prani të dy miqve të tij.
Krimi ndodhi në qendër të qytetit të Elbasanit, ndërsa policia përveç një makine të djegur dhe disa dëshmive të mbledhura, ka përcaktuar edhe pistën kryesore, atë të vrasjes së funksionarëve publikë.
Kjo do të thotë se hetimet do të kryhen nga Krimet e Rënda.
Burime policore bënë të ditur se nga kqyrja e kamerave të sigurisë, të cilat janë sekuestruar, rezulton se vrasësi i është afruar viktimës qetësisht, e ka përshëndetur, ndoshta për t’u bindur se pikërisht ai ishte objektivi, dhe më pas e ka qëlluar dy herë në kokë me armë me silenciator.
Dyshimet janë se autori mund të jetë një vrasës me pagesë, ndërsa vrasja është porositur nga persona të tjerë.
Për këtë arsye, po hetohen edhe qelizat telefonike në zonë, për të bërë të mundur mbledhjen e ndonjë të dhëne që mund të çojë në arrestimin e autorit/ëve.
Ravik Gurra 50-vjeç, ishte mbrojtës ligjor i shumë personazheve nga fisi Çapja, i Emiljano Shullazit, si avokat i dytë, por edhe shumë çështje të tjera në Elbasan dhe në Tiranë.
Gurra ka mbrojtur edhe dy vëllezërit Hysa, Agron dhe Kujtim Hysa, pronarët e firmës “Vëllezërit Hysa”, të akuzuar për abuzime në ndërtimin e rrugës Elbasan-Gjinar. Ata u arrestuan së bashku me dy ish drejtorë të ARRSH-së, Andi Toma dhe Dashamir Xhika.
Gurra po ashtu ka qenë edhe avokat i “Hakmarrjes për Drejtësi.
Gurra kishte mbaruar fakultetin e drejtësisë në Tiranë, ndërsa më pas në 1998 emigroi në Angli ku ndoqi disa kurse dhe specializime për avokaturën. Gjatë qëndrimit në Angli ai ka punuar edhe në sistemin e emigracionit si përkthyes, pasi e zotëronte mjaft mirë gjuhën.
Ravik Gurra ishte baba i dy vajza, i divorcuar nga familja që jeton në Londër, ai jetonte mes Anglisë dhe Elbasanit, ku kishte nënën dhe ushtronte profesionin. Gurra kishte një karrierë gati 10-vjeçare si avokat.
