Lali Eri organizoi në Tiranë festime në kuadrin e Ditës së Verës, e cila festohet më 14 mars, por për Bashkinë e Tiranës u shtynë me 3 ditë.
Ndër stendat e vendosura përgjatë bulevardit Dëshmorët e Kombit, në kuadrin e festimeve, ishte edhe ajo e Policisë së Shtetit.
Ndoshta ishte ndër stendat më të vizituara, veccanërisht nga fëmijët, që kishin kuriozitet të bënin foto me efektivë policie apo motorët që përdoren prej saj.
Por a mundet që stenda e vendosur pranë Ministrisë së Brendshme të rregullojë imazhin e policisë që drejtohet nga Sandër Lleshaj dhe Ardi Veliu?
Imazhet e shpërndara dje, kur nga forcat speciale të policisë u hodh gaz lotsjellës mes një turme protestuesish që kishte edhe të moshuar edhe fëmijë, apo përdorimi i ujit me presion edhe ndaj një të moshuari vështirë se mund të harrohen.
Por ky nuk është i vetmi episod. Pak ditë më parë, në një konflikt civil mes përmbaruesve dhe 4 familjeve në afërsi të shkollës “Petro Nini”, u shfaqën sërisht policët e Lleshajt dhe Veliut që dhunon prindërit në sy të fëmijëve, apo që këta të fundit tërhiqeshin prej krahësh nga efektivë policie, sikur të ishin kukulla.
Dhe po të shkohet pak më larg, të kujtohen sërisht momentet kur policia hidhte gazin si kurrë më parë ndaj protestuesve, në mes të tyre, pa pyetur se mund të kishte qytetarë të moshave të ndryshme.
Sot, policia e Lleshajt dhe Veliut, u shfaq sikur të mos kishte ndodhur asgjë 24 orë më parë. Ndoshta në atë stendë ndodheshin edhe ata që një ditë më parë hidhnin gaz dhe ujë mbi një të moshuar në afërsi të pedonales, apo që gazi i hedhur pa asnjë plan prekte edhe ata qytetarë që kishin banesat dhe bizneset në afërsi të Parlamentit.
Sot minimalisht në stendën e policisë duhej të ishte një pankartë ku të kërkohej minmalisht falje, pasi ndjesa mund të kërkohet nga ata që ia dinë kuptimin… /BN/
