Policia e drejtuar nga sandër Lleshi dhe Ardi Veliu, pas çdo proteste të opozitës, nis aksionet për kapjen e qytetarëve që marrin pjesë në protestë.
Kjo ndodhi edhe pas protestës së djeshme, ku të paktën sipas informacioneve zyrtare janë proceduar penalisht 33 persona, ndërsa mbahen të arrestuar dhe presin vendimin e gjykatës 14 protestues.
Përplasja e djeshme mes protestuesve dhe policisë ndodhi te Parlamenti, ndërsa ndaj protestuesve u hodh gaz dhe ujë me presion.
Shumë qytetarë mbetën të dëmtuar si pasojë e situatës së krijuar, ndërsa u detyruan të marrin ndihmë mjekësore në spital.
Fotot dhe videot që qarkullojnë në rrjet tregojnë se forca e treguar nga forca speciale të policisë, përmes gazit dhe ujit me presion, nuk kanë kursyer as fëmijë të mitur dhe as të moshuar.
E nëse 3 policët që u tha se janë dëmtuar u vizituan nga Drejtori i Përgjithshëm i Policisë, qytetarët që u dëmtuan nga gazi dhe presioni i ujit, nuk e patën këtë fat.
Thjesht në sytë e institucioneve që paguhen nga taksat e qytetarëve, ata që u dëmtuan me gaz apo me ujë, nuk ekzistojnë ose janë dhunues.
Protesta e djeshme ishte e treta protestë e madhe e organizuar brenda 1 muaji nga opozita dhe në të tre rastet, ndaj protestuesve, në turmë, është hedhur gaz. Nuk është pyetur nëse mes turmës ka të mitur apo të moshuar, ato janë trajtuar njësoj si dikush që mund të maskohet dhe të hedhë shashka apo gurë në drejtim të policisë.
Pas çdo proteste ka persona që ndalohen, arrestohen, dhunohen. Por ende nuk ka një njoftim, qoftë edhe formal, që dikush po heton mënyrën e veprimit të policisë, qoftë kjo edhe speciale.
Diksuh duhet të përgjigjet të paktën kur gazi është hedhur në drejtim të fëmijëve apo kur polici i mbuluar me skafandër dhe mburojë hedh ujë me presion ndaj një të moshuari, që më përpara e ka shtrirë në tokë gazi lotsjellës… /BN/
