Ervin Bushati, deputeti i PS-së në qarkun e Tiranës, do të hetohet për fshehje pasurie dhe fallsifikim dokumentesh.
Vendimi është marrë nga gjykata, pasi prokuroria e drejtuar nga Arta Marku, nuk nisi hetimet për ligjvënësin socialist, edhe pse dosja u depozitua në organin e akuzës nga Partia Demokratike.
Në kushtet kur prokuroria nuk hetoi deputetin Bushati, PD iu drejtua Gjykatës së Apelit, e cila ka vlerësuar nisjen e hetimeve.
Kjo do të thotë se Prokuroria duhet të hetojë akuzat e ngritura ndaj ligjvënësit socialist.
Zyrtarisht PD akuzon Bushatin se ka fshehur 7 pasuri, tre në Tiranë, 2 Sarandë dhe 2 Kavajë
“Ervin Bushati shpif ndaj opozitës për të mbrojtur Edi Ramën. Bushati ka nevojë për mbrojtjen e Ramës, për shkak të pasurive të fshehura. Ervin Bushati ka fshehur 7 pasuri të paluajtshme.
Ervin Bushati nuk ka deklaruar tre pasuri truall në Tiranë, një në Sarandë dhe ka fshehur një nga 13 garazhde në Sarandë.
Bushati ka fshehur edhe dy pasuri në Kavajë. Kjo është arsyeja se pse Edi Rama refuzon paketën antimafia të PD që parashikon sekuestrimin e pasurive të fituara në kundërshtim me ligjin. Nëse do të ishte gjyqtar apo prokuror, Bushati do të ishte shkarkuar“, thuhet ndër të tjera në denoncimin e PD-së.
Nga shqyrtimi i dokumentacionit zyrtar rezulton se:
- Nuk ka deklaruar pasuri me sipërfaqe 938 m2 në Tiranë, fituar më 21 prill 2017.
- Po në Tiranë, nuk ka deklaruar një pasuri truall me sipërfaqe 600 m2, e fituar po në 21 prill 2017.
- Në Tiranë Ervin Bushati nuk ka deklaruar as pasurinë me sipërfaqe 938 m2 truall, fituar më 25 korrik 2014.
- Në Sarandë, deputeti i Edi Ramës nuk ka deklaruar pasuri me sipërfaqe 660 m2 truall, e fituar më 17 Korrik 2014.
- Po në Sarandë, ka fshehur pronësinë e 1 nga 13 garazheve në pronësi të tij.
- Deputeti i Ramës ka fshehur dy pasuri në Qerret të Kavajës, të fituara në të njëjtën ditë, 30 maj 2016; njëra pasuri truall 376 m2, tjetra ndërtesë me sipërfaqe 76 m2.
