Në Kuvendin e Shqipërisë janë betuar sot deputetët e rinj, që po plotësojnë vendet e mbetura vakant pas dorëzimit të mandateve nga ligjvënësit e partive opozitare.
Ndër emrat që është betuar dhe ka marrë mandatin si deputet i PD-së për qarkun e Beratit është edhe Lefter Maliqi.
Ky i fundit, ka qenë më parë deputet i PD-së, kur kjo e fundit drejtohej nga ish-kryeministri Sali Berisha.
Në 2017, Maliqi renditej i 3-ti në listën e kandidatëve demokratë për qarkun e Beratit, por për shkak të përplasjeve me kreun demokrat Lulzim Basha, ai u shfaq në krah të socialistëve, duke bërë fushatë pro kryeministrit Edi Rama. Madje duke i uruar Ramës fitore të thellë në zgjedhjet e 25 qershorit, Maliqi shprehu bindjen se ai do të drejtojë fushatën edhe në 2021.
Në seancën e parë të rikthimit si deputet në Kuvend, Maliqi tha se opozita duhet të ndryshojë lidershipin, ndërsa përshëndeti me dy gishtat lart.
Ai zëvendësoi ish-deputetin Astrit Veliaj, i cili dorëzoi mandatin e deputetit.
Para se të merrte mandatin e deputetit, Maliqi mbante postin e zv.Drejtorit të Përgjithshëm të Burgjeve.
