Të shtëna armësh zjarri janë verifikuar mbrëmjen e kësaj të mërkure pranë parkut “Rinia”, në Elbasan. Policia e Shtetit në variantin zyrtar bëri me dije se pjesëtarë të familjes Çapja kanë qëlluar në drejtim të disa efektivëve të policisë, por për fat të mirë nuk ka patur të plagosur.
Por burime konfidenciale për Boldnews.al konfirmojnë tjetër variant të bërë publik nga Policia e Shtetit. Sipas burimeve, bëhet me dije se kanë qenë katër policë pa uniformë me makinë private në mision vëzhgimi. Ata kanë kaluar disa herë me makinë para hotel Univers. Ky veprim është marrë si provokim nga pjesëtarët e familjes Çapaj, të cilëve u kanë lindur dyshime se mund të jenë hasmit. Për këtë, ata kanë ndjekur makinën private me efektivët pa uniformë dhe kanë qëlluar mbi ta ndërkohë që edhe policia është kundërpërgjigjur me të njëjtën mënyrë.
Fatmirësisht nga të shtënat me armë nuk ka të lënduar në radhët e uniformave blu dhe as nga pala tjetër. Zyrtarisht nga policia, mësohet se forcat e rendit kanë rrethuar një automjet tip “Honda”, me targë “AA 411 AU”, në pronësi të Çapajve.
Gjithashtu, blutë kanë shoqëruar dy prej tyre në Komisariat, ndërsa po vijon puna për kapjen e një tjetri.
Ngjarja e sotme vjen vetëm dy ditë pas atentatit ndaj Florenc Çapaj, në të cilin mbeti i plagosur miku i tij Bledar Muça, si edhe një efektive policie, kalimtare e rastësishme.
