Këshilli i Lartë i Prokurorisë vendosi sot me shumicë votash përfundimin e mandatit të prokurorit Petrit Fusha, pasi ky i fundit dha dorëheqjen.
Anëtarët e KLP, në një mbledhje me dyer të mbyllura, vendosën që Fusha të jetë në detyrë deri më 31 mars.
Petrit Fusha kishte paraqitur dorëheqjen nga detyra që më datë 28 shkurt, ndërkohë që në arsyet e largimit, ai theksonte se do të merrej me angazhime të tjera dhe se kishte mjaft kontribut në sistemin e Drejtësisë dhe aftësitë e tij do t’i shfrytëzonte me një punë me më pak ngarkesë.
“Pas 32 viteve pune në shërbimin e Prokurorisë, çmoj se përvojën që kam mund ta përdor në dobi të një aktiviteti tjetër me më pak ngarkesë.
Koha në të cilën po jetojmë është tej ngarkuar me ngjarje e fenomene të drejta e të pa drejta. Një profesionist në moshën time natyrshëm zgjedh me maturi vendin se ku mund të kontribuojë më mirë.
Ndaj gjykova se Prokuroria nuk është më vendi ku unë mund të shërbej me përvojën 32 vjeçare. Një përvojë e akumuluar tashmë nga procese hetimore e gjykimi të çdo lloj çështje e niveli.
Në këto kushte ju paraqes sot dorëheqjen time nga detyra e Prokurorit në Prokurorinë e Përgjithshme si dhe nga shërbimi i Prokurorisë”, thuhet në letrën e Fushës.
