Një vendim i Gjykatës së Firences në Itali, ka vënë në lëvizje policinë e Tiranës, që ka vënë në pranga 49-vjeçarin nga Dibra, Mentor Koltraka.
“Forca e Operacioneve Speciale dhe Kërkimit në Drejtorinë Vendore të Policisë Tiranë, në bashkëpunim me Interpol Tirana, arrestuan përkohësisht shtetasin e shqiptar të shpallur në kërkim ndërkombëtar: M.K. (Mentor Koltraka), 49 vjeç, banues në Tiranë. Autoritetet Italiane kanë lëshuar ndaj këtij shtetasi urdhër-arresti ndërkombëtar në zbatim të vendimit të Gjykatës së Apelit në Firence, Itali, e cila e ka dënuar këtë shtetas me 14 vjet e 4 muaj e 5 ditë burg, për veprën penale ‘Shfrytëzimi i prostitucioni’, parashikuar nga neni 110 dhe nenet 3,4,5 dhe 8 të Ligjit Nr.75 të Kodit Penal Italian, shtuan të njëjtat burime”, njoftoi zyrtarisht këtë të martë Policia e Tiranës.
Në një artikull të publikuar në 18 shkurt 2004, italiania “La Repubblica” raportonte për veprimtarinë e grupit të prostitucionit. Në artikull, shkruhej se Mentor Koltraka ishte “truri” i grupit, bashkë me të vëllanë Imer dhe shqiptarin tjetër Besnik Cara.
Sipas të njëjtave burime, banda merrte vajza nga Shqipëria, Moldavia, Rusia e Rumania dhe i detyronin të prostituonin në Itali. Grupi kishte rreth 50 vajza që i shfrytëzonte për prostitucion në Firence. Gjatë aksionit të shkurtit të 2004-ës, gjatë së cilës u arrestuan edhe 7 shqiptarë, mes tyre dhe tre personat e cilësuar si “truri” i grupit, u sekuestruan mijëra euro: 35 mijë euro në dy llogari bankare dhe 20 mijë euro në një prej disa banesave, që sipas hetuesve përdorej nga grupi për shfrytëzimin e prostitucionit.
Raportohet se grupi fitonte mbi 130 mijë euro në vit nga ky aktivitet.
Përveç shfrytëzimit të vajzave drejtpërdrejtë për prostitucion, grupi është akuzuar se ka blerë vajza që jetonin ne vendet e Lindjes në vështirësi financiare dhe i shiste, te grupe të tjera kriminale. /BoldNews.al/
