Ka përfundur takimi i kryeministrit Edi Rama me kreun e opozitës Lulzim Basha për reformën në drejtësi. Rama ka deklaruar pas takimit se PD e refuzoi draftin e reformës në drejtësi dhe se nga ky moment maxhoranca do vazhdojë rrugën e saj dhe drafti do të shkojë në sallën e parlamentit.
“Ne ishim mikëpritësit dhe ishte në dëshirën e miqve që unë të dilja përpara jush.
Nuk arritëm ta bindnim PD për të votuar së bashku draftin e bërë bashkë”, u shpreh Rama para medias.
“Në tavolinë ishte vënë drafti për të cilin ne kemi rënë dakord. Për habinë e shumë kujt por jo timen, PD e refuzoi këtë ofertë që e barazon pozitën dhe opozitën për të votuar sistemin gjyqësor. Unë nuk u habita, sepse nuk hyj tek ata që besoj se PD e do Reformën në Drejtësi.
Nuk kemi dashur, lënë shteg PD për asnjë lloj justifikimi, as në sytë e shqiptarëve, as të ndërkombëtarëve. PD nuk ka lënë asgjë pa bërë, që ta zvarrisë këtë reformë dhe për të ndryshuar thelbin e saj.
Por sonte PD nuk mund tu tregojë dot as shqiptarëve, as Brukselit, Uashingtonit, asnjë arsye të vetme që nuk mund të justifikojë mos votimin e Reformës në Drejtësi. Ato që do të thotë do të mund ti besojë vetëm vetë”, vazhdoi në fjalën e tij pas takimit, Rama.
“Ne nuk do ta presim më PD, do të vazhdojmë në rrugën që kemi nisur. Deri në ditën e votës, ka orë dhe ditë”, u shpreh Rama.
“Nëse ata do të jenë gati për të folur, nga sot ne jemi gati. Jemi gati të dëgjojmë çdo ide që nuk cenon draftin. Ne duhet të shembim përtokë sistemin e drejtësisë, KLD-në, e kush prokuror do të dojë që të punojë duhet të deklarojë pasurinë.
Shumica e nevojshme prej 2/3, 94 vota aq sa duhen për të ndryshuar Kushtetutën e Republikës në dispozicion të këtij procesi, që të japë pëlqimin për kandidaturat që shkojnë në gjyqësore. Prandaj kjo Reformë mbështetet nga SHBA, BE e ne. Kjo reformë i hap portën popullit shqiptar për integrimin në BE”, tha gjatë fjalës së tij kryeministri Edi Rama.
Kreu i PD-së, Lulzim Basha duke folur pas takimit me kryeministrin Edi Rama, u shpreh se opozita është për një drejtësi që nuk kapet nga politika e cila mbrojë Shullazin, Kokëdhimën, Habilajn etj.
“Si kryetar i PD e i opozitës, erdha sot në këtë takim me vullnetin për të kërkuar dhe ofruar zgjidhje, që do ti japë shqiptarëve një drejtësi që nuk mbron korrupsionin dhe krimin e organizuar. Që nga dita e parë, synimi i PD-së ka qenë që drejtësia të mos kapet nga politika.
Nëse politika nuk do ti mbronte Shullazin, Kokëdhimën, Habilajn, etj. Të gjithë e mbani mend që në shtator kur PD dhe opozita dha kontributin e saj dhe në dhjetor të 2015 Venecia i hapi dritën opozitës për shqetësimet e saj.
Javët e para të Janarit 2016 u harxhuan për të përjashtuar opozitën dhe mungesën e një kompromisi.
Në dy muajt e fundit mazhoranca ka refuzuar mundësinë e një kompromisi për këtë reformë, ashtu siç këshillon Venecia. Për këtë arsye u bë një ndërhyrje e tretë nga ndërkombëtarët. Që në Shkurt opozita ka pranuar draftin e ndërkombëtarëve, ku vështirësohet kapja e Reformës në Drejtësi nga politika.
Kryeministri pak më parë para jush është shprehur se, PD nuk e do reformën. Kjo nuk është e vërtetë sepse ne kemi prezantuar propozimet tona, për vendet e rezervuara. Por atyre thjeshtë nuk u pëlqejnë. Është mungesë vullneti që bashkë me opozitën ti jepet vendit një Reformë në Drejtësi”, u shpreh Basha.
“Ne erdhëm në këtë tryezë për të biseduar, por pala tjetër kishte ardhur me një fjalim të bërë gati që më parë”, theksoi kreu i PD-së.
