Nënkryetari i PD-së, Edi Paloka, tha mbrëmjen e sotme se Edi Rama sot u tregua burracak, pasi vetë iku në Lushnje, ndërsa deputetit i solli në Kuvend.
Paloka tha se do të ishte mirë që Rama të ruante deputetët, ashtu sikundër ruajti veten e tij.
“Në asnjë rast Rama nuk do të na gjejë të papërgatitur, sikundër mendoi sot. Protesta e sotme u organizua brenda 4 orësh dhe nëse ai mendon se kjo situatë është normale, do të vazhdojë.
Në çdo vend ku Rama do të përpiqet të tregojë se situata është normale do të ketë përballjen tonë.
Rama po e çon vendin drejt përplasjes. Ia kemi bërë të qartë ndërkombëtarëve se me Ramën as stabilitet nuk do të ketë dot. Sot ishte gjendje lufte dhe ishte policia që nga një fërkim me protestuesit hodhi helm ndaj protestuesve”, tha Paloka në studion e Opinion.
Sipas tij, nëse Rama do të vazhdojë me arrogancën përplasja është e pashmangshme.
“Ne morëm aktin e fundit politik, ne bëmë aktin e fundit paqësor. Ky vend nuk mund të vazhdojë të qeveriset me arrogancë”, tha Paloka.
Nënkryetari i PD-së theksoi se policia me veprimet që ka bërë sot është kthyer në një shërbëtore të verbër.
Sipas Palokës, gjenerali që u vu në Ministrinë e Brendshme, është kthyer në një ushtar.
