Kryetari i PD-së Lulzim Basha ka firmosur lënien e madnatit të deputetit.
Me doreheqjen nga mandati i deputetit, Basha fton qytetaret ne proteste neser ne oren 10.00, para Parlamentit. “Nuk ka kthim pas! Nesër së bashku si qytetarë të lirë para parlamentit”, shkruan Basha në një mesazh në rrjetet sociale.
“Duke patur parasysh gjendje e emergjencës kombëtare, ku ndodhet vendi:
- Për shkak të asgjësimit të demokracisë funksionale dhe shtetit të së drejtës;
- Për shkak të kapjes së kësaj Qeverie në flagrancë duke vjedhur votat e qytetarëve shqiptarë, siç dëshmojnë edhe dosjet gjyqësore të publikuara nga mediat ndërkombëtare;
- Të eliminimit të parlamentit si një forum i demokracisë;
- Për shkak të kapjes së kësaj Qeverie në afera flagrante korruptive dhe kriminale;
- Të paralizës së shtetit, shtypjes sistematike dhe dhunimit të të drejtave themelore të njeriut dhe lirive të shqiptarëve duke përfshirë të drejtën e jetës, shëndetit dhe pronës;
Duke mbajtur në konsideratë se për këtë shkak është shkaktuar një situatë e paprecedentë e krizës ekonomike, emigracionit masiv kombëtar dhe gjendjes katastrofale të mjerimit social;
Duke mbështetur plotësisht vendimin e Këshillit Kombëtar të Partisë Demokratike dhe zgjidhjen politike të ofruar nga opozita e bashkuar të një Qeverie tranzitore, të gatshme për të ndërmarrë të gjitha hapat e nevojshëm, që do të garantojnë zgjedhje të lira dhe të ndershme dhe zhbllokimin e procesit të integrimit europian të Shqipërisë dhe hapjes së negociatave me Bashkimin Europian, përmes zgjedhjeve të lira dhe të ndershme të parakohshme parlamentare;
ME VULLNET TË LIRË DEKLAROJ:
Unë, Lulzim Basha, deputet i Kuvendit të Shqipërisë, duke e vlerësuar si të pamundur vijimin e punës në Kuvendin e Shqipërisë, në mbështetje të shkronjës “b”, pika 2, e nenit 71 të Kushtetutës, jap dorëheqjen e parevokueshme nga mandati si deputet në Kuvendin e Shqipërisë”, thuhet në letrën drejtuar Kuvendit, që mban firmën e Lulzim Bashës.
Ditën e sotme, deputetët e Partisë Demokratike kanë kanë nisur të firmosin për djegien e mandateve. Nga LSI, partia tjetër opozitare, gjithashtu ka nisur firmosja e lënies së mandateve. Edhe PDIU ka konfirmuar qëndrimin për djegien e mandateve. /Boldnews.al/
