Pas PD, kanë nisur lëniet e mandatit edhe nga radhët e LSI-së.
Drejtuesja e kësaj force politike ka firmosur dorëheqjen nga mandati i deputetes, në një kërkesë drejtuar Kuvendit.
Në kërkesën drejtuar Kuvendit, Monika Kryemadhi sqaron edhe arsyet e lënies së mandatit të deputetes.
“Duke patur parasysh gjendje e emergjencës kombëtare, ku ndodhet vendi:
- Për shkak të asgjësimit të demokracisë funksionale dhe shtetit të së drejtës;
- Për shkak të kapjes së kësaj Qeverie në flagrancë duke vjedhur votat e qytetarëve shqiptarë, siç dëshmojnë edhe dosjet gjyqësore të publikuara nga mediat ndërkombëtare;
- Të eliminimit të parlamentit si një forum i demokracisë;
- Për shkak të kapjes së kësaj Qeverie në afera flagrante korruptive dhe kriminale;
- Të paralizës së shtetit, shtypjes sistematike dhe dhunimit të të drejtave themelore të njeriut dhe lirive të shqiptarëve duke përfshirë të drejtën e jetës, shëndetit dhe pronës;
Duke mbajtur në konsideratë se për këtë shkak është shkaktuar një situatë e paprecedentë e krizës ekonomike, emigracionit masiv kombëtar dhe gjendjes katastrofale të mjerimit social;
Duke mbështetur plotësisht vendimin e Grupit Parlamentar të Lëvizjes Socialiste për Integrim dhe zgjidhjen politike të ofruar nga opozita e bashkuar të një Qeverie tranzitore, të gatshme për të ndërmarrë të gjitha hapat e nevojshëm, që do të garantojnë zgjedhje të lira dhe të ndershme dhe zhbllokimin e procesit të integrimit europian të Shqipërisë dhe hapjes së negociatave me Bashkimin Europian, përmes zgjedhjeve të lira dhe të ndershme të parakohshme parlamentare;
ME VULLNET TË LIRË DEKLAROJ:
Unë, Monika Ramazan Kryemadhi, deputet i Kuvendit të Shqipërisë, duke e vlerësuar si të pamundur vijimin e punës në Kuvendin e Shqipërisë, në mbështetje të shkronjës “b”, pika 2, e nenit 71 të Kushtetutës, jap dorëheqjen e parevokueshme nga mandati si deputet në Kuvendin e Shqipërisë”, thuhet në letrën që mban firmën e Kryemadhit.
Nga radhët e LSI-së, është shprehur kundër lënies së mandatit të deputetit vetëm Lefter Koka.
/Boldnews.al/
