Ministrja e Shtetit, Elisa Spiropali, hodhi poshtë dyshimet e ngritura nga një investigim i publikuar të hënën nga “Boldnews.al”, në të cilën u provua me dokumenta zyrtare se kompania e vëllait të saj ka fituar tender në Ujësjellës-Kanalizime të Fierit, në kohën që drejtohej nga Salarjon Totaj, i cili vetëm pak muaj më pas u bë zyrtarisht bashkëshorti i saj.
Nëpërmjet një statusi në rrjetin social “Facebook”, Spiropali shkruan, ndër të tjera, se “Vëllai im nuk ka përfituar kurrë dhe asnjëherë asnjë kontratë apo fond publik, as kur isha beqare, as kur u martova, as kur isha aktiviste, as kur isha drejtore, e as tani si ministër”.
Dokumentat e publikuara nga “Boldnews.al” dëshmuan se Enkli Spiropali, vëllai i Ministres së Shtetit, ka regjistruar në Gusht 2013 kompaninë ‘Solomon Construction”, me seli në Fier.
Gjithnjë sipas dokumentave zyrtare, kompania e Enkli Spiropalit, pra “Solomon Construction”, në 27 Mars 2014, u shpall fituese e tenderit “Blerje material për ofiçinë”, të zhvilluar nga Ujësjellës-Kanalizime Fier, me vlerë 6.6 milionë lekë të reja.
Vetëm 4 ditë pasi fitoi këtë tender, Enkli Spiropali vendosi të shesë kompaninë e tij. Me kontratën nr.1040 Rep, nr. 577 Kol, dt. 01.04.2014, vëllai i ministres së sotme ia shet kompaninë shtetasit Marjus Memushaj, kushëri i dytë i Salarjon Totaj, partnerit dhe më pas bashkëshortit të Elisa Spiropalit.
Dokumentat e publikuara më parë nga “Boldnews.al”, të risjella edhe në këtë shkrim, provojnë më së paku të kundërtën e pretendimeve të Ministres së Shtetit, Elisa Spiropali.
Siç rezulton, kompania “Solomon Construction” e Enkli Spiropalit ka fituar të paktën një tender publik, me vlerë 6.6 milionë lekë, në institucionin e drejtuar nga Salarjon Totaj.
Më pas, kompania ‘Solomon Construction”, e drejtuar nga Marjus Memushaj ka fituar edhe disa tendera të tjerë, me vlerë rreth 30 milionë lekë të reja nga institucioni i drejtuar nga kushëriri i tij i dytë, Salarjon Totaj.
