Qytetarët e arrestuar nga policia, pas protestës së opozitës më 16 shkurt, pritet të dalin sot para Gjykatës për t’u njohur me masën e sigurisë.
Policia arrestoi 16 persona, të akuzuar për dhunë dhe kundërshtim të forcave të policisë, si dhe shkatërrim të pronës publike.
Për të gjithë të pandehurit do të kërkohet “arrest me burg” nga prokuroria. Mes të arrestuarve është edhe ish-kreu i policisë bashkiake të Tiranës, Florenc Hoxha.
Arrestimet erdhën pas pamjeve filmike, ndërkohë që një ditë më parë Avokati i Popullit, tha se po heton mënyrën sesi policia ka kryer ndalimet e qytetarëve dhe dhunën ndaj Florenc Hoxhës, të cilit i janë shkaktuar hematoma në kokë.
Prokuroria pritet të verifikojë gjithashtu veprimet e Gardës së Republikës dhe Policisë së Shtetit, për planin e masave që janë marrë para dhe gjatë protestës si dhe a është zbatuar ai plan dhe a ka patur tejkalim të kompetencave të policisë.
Gjithashtu pritet edhe përfundimi i ekspertizave të policisë shkencore për lëndet e përdorura në protestë si nga ana e protestuesve dhe nga ana e Policisë dhe Gardës.
Avokati i Popullit gjithashtu ka nisur një hetim mbi gazin që është përdorur ndaj protestuesve, i cili nuk ka qenë thjesht lotsjellës, pasi ka shkaktuar komplikacione që kanë zgjatur rreth 24 orë.
Nga protesta e 16 shkurtit, mbi 19 persona iu drejtuan për ndihmë qendrës spitalore për shkak të gazit që hidhej nga efektivë të Gardës nga tarraca e kryeministrisë.
