Europol ka mbështetur një hetim të koordinuar nga Policia Gjyqësore Federale e Leuven (Belgjikë) ndaj një bande shqiptaro-belge të trafikimit të drogës.
Operacioni u zhvillua ndërmjet datave 4 dhe 6 shkurt kur shërbimet e policisë ndërhynë për të shkatërruar rrjetin e organizuar kriminal në Belgjikë dhe Zvicër, që vepronte në vende të ndryshme.
Në total, 22 të dyshuar u arrestuan dhe gjashtë u dërguan në burg nga autoritetet në Leuven. Policia kontrolloi 24 shtëpi në Belgjikë dhe veprime të ndryshme u kryen në Zvicër në të njëjtën kohë.
Hetimi çoi në zbulimin e gjashtë plantacioneve me kanabis me një total prej 4 500 bimësh.
Gjatë operacionit, një plantacion me kanabis me 1000 bimë u gjet në një ish-klub striptizmi. Ky plantacion i veçantë ruhej nga dy të dyshuar me origjinë shqiptare.
Përveç kësaj, u konfiskuan sasi të mëdha kanabis, armë zjarri, xhaketa antiplumb dhe 10 000 euro.
Këto hetime komplekse penale filluan në vjeshtën e vitit 2017, pasi policia mori informacion se një organizatë belge-shqiptare importonte dhe eksportonte narkotikë në një sasi të madhe.
Europol mbështeti hetimin që nga fillimi duke lehtësuar shkëmbimin e informacioneve, si dhe duke ofruar mbështetje analitike, financiare dhe teknike. /Boldnews.al/
