Bashkia e Tiranës ka filluar të zbatojë një nga projektet më të debatuara për kryeqytetin, ai i pagesës për parkimin. Në fund të vitit të kaluar, Këshilli Bashkiak miratoi zonat dhe tarifat ku qytetarët duhet të pagujnë për një vend parkimi. Megjithëse kjo nismë u debatua, ajo u votua në Këshill dhe për rrjedhojë, ka filluar të zbatohet në disa vende të Tiranës.
Tashmë, Bashkia e Tiranës e ka marrë seriozisht, dhe krahas ngritjes së strukturës “Tirana Parking”, ka prenotuar edhe bileta. Në dokumentet që disponon Bold News rezulton se Bashkia ka hapur një tender me objekt “Objekti i kontratës/marrëveshjes kuadër ‘blerje bileta për parkimet’”.
Fondi limit është 158 milionë lekë të vjetra, të vënë në dispozicion nga Buxheti i Bashkisë së Tiranës për vitin 2016, miratuar me VKB Nr.58, datë 30.12.2015 “Për miratimin e programit buxhetor afat-mesëm 2016 – 2018 dhe detajimin e buxhetit të Tirana Parking për vitin 2016”. Mësohet se ky tender është ndarë në lote. Loti i parë është për blerje bileta elektronike për sistemet e parkimit, me fond limit 117 milionë lekë. Loti i dytë është blerje blloqe biletash për parkimin në rrugë, me fond limit: 40 milionë lekë.
Mësohet se janë kërkuar të blihen 2,500,000 bileta elektronike për sistemet e parkimit dhe 45,000 blloqe 50 fije biletash për parkimin në rrugë. Mësohet se formati do të jetë 86.5 x 53.85 mm, letër termike 230 gr/m2, shtypur me 4 ngjyra në një anë, prerje me formë dhe bileta të vazhduara, paketimi 5000 copë bileta të pandërprera. Gjithashtu, ato duhet të jenë të ambalazhuara me karton dhe me qese, ku të jetë e mbyllur hermetikisht sipas formës së paketimit të kartonit. Paketimi të jetë me njoftim për fundin e stokut, trashësia e biletës 231 mikrometër dhe temperatura e djegies së letrës termike 40 OC me ndryshim 85 OC.
