Elisa Spiropali, ministre e Shtetit për Marrëdhëniet me Parlamentin, ka shpërndarë një video-mesazh, pas takimit që ka pasur me gjyshin e vajzës së mitur nga Kavaja, e dhunuar nga disa adoleshentë që tashmë janë arrestuar.
Spiropali është kujdesur në këtë mesazh që të fajësojë gjithkënd që denoncoi dhe sensibilizoi opinionin mbi një ngjarje macabre, e cila as nuk raportohej dhe as dhunuesit e 13-vjeçares nuk arrestoheshin.
Një ditë më parë, Elisa e konsideroi ngjarjen e rëndë si një fenomen të përhapur, madje tha se mbi raste të tilla bëheshin edhe filma.
“Raste të tilla, fatkeqësisht ndodhin edhe në vende të tjera shumë të zhvilluara, ka raste në Amerikë, Suedi, Finlandë e kudo tjetër, bëhen edhe filma për raste të tilla, të tmerrshme që kanë një ndjeshmëri të lartë sociale, ama kurrë, asnjë parti politike në këto vende nuk del për ta përdorur rastin për politikë dhe për të gjetur fajtorin, shkaqet dhe pasojat tek qeveria e një vendi”, do shprehej Spiropali nga podiumi i qeverisë.
Sot zgjodhi të flasë përmes një video-mesazhi, por sërisht zgjodhi rrugën e të hedhurit baltë dhe kujtoi Kodin Penal që mbron të miturit në çdo fazë hetimi dhe gjykimi.
Harroi të thoshte se institucionet e shtetit, në rradhë të parë kanë detyrimin të mbrojnë qytetarët dhe veçanërisht fëmijët, aq më tepër kur janë në një moshë të mitur,
Spiropali u kujdes për të sulmuar apo akuzuar ata, qofshin politikanë, gazetarë apo përfaqësues të shoqërisë civile, që kërkuan marrjen e përgjegjësive nga institucionet që kanë për detyrë të mbrojnë fëmijët.
Ashtu si Kryeministri, edhe ajo, ende nuk kanë dënuar atë që ka ndodhur.
Mund të mësojnë pak nga Kryeministri i Kosovës, i cili një rast abuziv të ngjashëm, apo jo në përmasa të tilla e denoncoi, e dënoi dhe në fund kishte një apel ku ftonte cilindo që ndjehej i dhunuar të bënte denoncimin përkatës.
Dhe në fund, Elisa bashkë me disa prej Mjaft-istëve apo G 99, në 2011 nuk nguruan të shpikin një histori, ta kthejnë në horror, ta çojnë nga ambasadat e Tiranës drejt Brukselit, ndërsa sot nuk japin shpjegime se ku janë oficerët e sigurisë në shkolla…
