Kreu i Komisionit parlamentar të Dekriminalizimit, Oerd Bylykbashi ka reaguar pas dorëheqjes së kryebashkiakut të Kavajës, Elvis Rroshi, i cili ka rezultuar i dënuar në Itali për përdhunim.
Bylykbashki shkruan në facebook se kush dënohet për përdhunim, ndalohet përjetë të mbajë funksione publike dhe se fshehja e këtij dënimi në formularin e vetëdeklarimit përbën vepër penale më vete.
“Ligji i dekriminalizimit funksionon që çke me të! Prova madhore e fitores se kauzës së PD erdhi sot kur Elvis Ervin Rroshi dha dorëheqjen i detyruar nga ligji i dekriminalizimit. Gjykata italiane e ka dënuar me burgim sipas nenit 519 të Kodit Penal për përdhunim. Fshehja e këtij dënimi në formularin e vetëdeklarimit përbën vepër penale më vete sipas nenit 190 te Kodit Penal. Kush dënohet sot për përdhunim, ndalohet përjetë që të mbajë funksione publike. Kurdo që të jesh dënuar në të shkuarën për përdhunim, ndalohesh përjetë për të mbajtur funksione publike”, deklaron Bylykabashi.
Ai solli më tej një shembull. “Përdhunimi në të Drejtën Romake dënohej me vdekje. Për fat jemi në demokraci dhe kjo nuk ndodh më, por përdhunimin dhe përdhunuesin nuk e pranon askush, aq më pak si funksionar publik!”
Por Bylykbashi paralajmëron të tjera dënime dhe dorëheqje. “Rama të presë se nuk ka parë ende asgjë! Shpejt do të dalë në shesh një dënim në Zvicër për trafik droge. Radhën për dorëheqje e kanë të tjere. Turp, turp!”, përfundon ai.
