Debati për Unazën e Re ka prodhuar pasditen e sotme përplasje në distancë mes Presidentit, Kryeministrit dhe Kryebashkiakut të Tiranës, Erjon Veliaj, ku secila nga palët ka shkëmbyer replika dhe akuza.
Gjithçka nisi pas takimit të Metës me banorë të unazës së re, ndërtesat e të cilëve preken nga projekti.
Pas replikave në distancë mes Ramës dhe Metës lidhur me këtë project, ka ardhur edhe reagimi i Kryebashkiakut Erjon Veliaj, i cili ndoshta në mënyrë të sforcuar ka sulmuar Presidentin, pot ë keni parasysh këtu konsideratën e lartë që LSI ka për të.
Në reagimin e tij ndaj Metës, Veliaj thotë se Unaza e Re i duhet Tiranës dhe se institucionet kanë ofruar strehim falas për ata që janë të pastrehë dhe shpronësim qind për qind për atë që i kanë pronat me letra.
“Te Unaza e Re:
💶 Shpronësim 100%
🚔 Kompanitë hileqare në arrest
Unaza i duhet Tiranës. Do qe zhgënjyese nëse vemi nga Presidenti anti-lodra tek ai anti-rrugë! Mos saboto Tiranen”, shkruan Veliaj.
Më tej në një tjetër postim ai shprehet se 99 % e qytetarëve të Tiranës e duan Unazën dhe nuk duan që të bllokohen nga trafiku.
“Çdo ditë, për orë të tëra, bllokohen në Unazën e Re nga protestat me djegie gomash e hunjsh dhe grupseksionet e dhunshme të PD Kamëz, 99% e qytetarëve të Tiranës që as kanë zaptuar e as bëjnë lojëra politike.
Nëse Presidenti inkurajon këtë 1% të hurit e zjarrit, kot që flasim”, shkruan Veliaj.
Pas postimeve nga Veliaj, ka ardhur reagimi i Presidencës, sipas të cilit 100 e shqiptarëve neverisin korrupsionin te Unaza e Re.
“100 për qind e qytetarëve e neverisin KORRUPSIONIN e pacipë dhe KRIMINAL të Unazës së Re!”, shkruan Zëdhënësi i Presidentit.
Kjo është përballja e parë publike mes Kryebashkiakut dhe Ilir Metës, ndërsa nuk dihet nëse reagimi i Veliajt do të ndryshojë ose jo raportet dhe vlerësimet që të paktën kryetarja e LSI-së, Monika Kryemadhi, ka bërë publikisht për të.
